星爺講過人人都係食神，計我話，今時今日人人係大導先真！拍攝器材氾濫，隨手一部iPhone都有720p畫質，仲有YouTube幫你發行！雖然奥斯卡頒獎禮上《127小時》全軍覆沒，不過唔少外國粉絲一早上晒腦，自拍被困短片，橋段勁騎呢，仲改埋名《127秒》！
記者：王震遠
電影資料館
《127小時》真人真事
山頭野嶺被困超過5日，諗起人都癲！《127小時》講述攀山專家Aron被困嘅古仔，並由真人真事改編，睇落嚟零舍有血有淚。話說主角Aron獨遊峽谷，點知失手被困谷底，右手仲俾大石壓住；面對飢寒交迫又走唔甩嘅困局，好多人會嚇到黐線，不過主角意志力驚人，最後決定壯士斷臂，單手爬上60呎高懸崖鬆人！
YouTube山寨版！
勁爆笑 結局 局中局
呢位網友勁抵死幽默！先講造型，衣着抄到足，起碼一睇就知扮Aron，片頭一開始見主角周圍執嘢，準備去行山，仲有伏線話你知佢無帶刀。點知萬事俱備，出門口嘅時候件衫俾道門夾住，本來好似好無聊，點知佢表情多多又入戲，不斷穿插《127小時》嘅橋段，跌鉸剪、出現幻覺等等，以為結局係突然有人開門獲救？錯！結局仲有後着！
網址： http://www.youtube.com/watch?v=Gnd8tID0QJg
攞晒獎 專業腥片
條片報稱係TrailerWarsXV比賽冠軍！開場講兩隊人玩冰壺，主角唔小心跌低，點知條脷俾冰黐住咗，真係想嗌救命都唔得，結果都係用《127小時》嗰招自救！無奈1分鐘之後竟然有人出現。網片嚟講質素真係超班，有Lighting、有Filming，故事用簡單方法表達，但勝在緊湊。
網址： http://www.youtube.com/watch?v=dNLGFa01tdY
超爛GAG 花士令救命
四眼主角學足套戲咁周圍拍片，失驚無神走去問路搵零食販賣機、買朱古力食，點知入錢後件貨無跌落嚟，惟有夾硬伸手去掹，意外咁就發生！花士令、膠刀出盡，最後都自救唔到。整條片似HomeVideo式拍法，用販賣機條橋勝在就手，講合理就無可能，惟有當花士令係笑點，冷笑幾下啦！
網址： http://www.youtube.com/watch?v=1EoKkH9LrLU
堅流攤 屎橋困屎坑
一開波主角無啦啦喺室內踩板，又無啦啦插入《一百萬零一夜》片段，真係唔知想點！再嚟學原劇炒滑板都算有誠意，但之後遇見美女，跟住又無啦啦爬入廁格，睇住佢穿崩咁穿隻手入廁紙架內，絕對屎坑橋！小記最睇唔過眼片尾學人拉尾嘅快鏡，一睇知你無用穩定架，出醜！
網址： http://www.youtube.com/watch?v=6JlNv1ru_2k