米高（MichaelShum）唔止賣車叻，旁述F1更出晒名。但因聲帶問題，ESPN哄完都唔出山，搞到fb過千Fans留言話唔捨得。今年FIA又改例，三月開始嘅賽事將更難預測，米高決定轉戰《蘋果》噴口水止癮！
記者：徐影龍
攝影：陳盛臣
MichaelShum（沈國成）
米高係工程師出身，對機械熟到不得了，最廣為人熟悉，都係近年為ESPN旁述F1賽事，由賽車到車手都滾瓜爛熟，堪稱車壇董驃。但近年聲帶問題，難以支撐講足18場分站賽事，惟有忍痛退下來。今年ESPN力邀米高復出幫拖，他口裏婉拒，但仍相約記者嘆茶傾偈，發表今年F1賽事嘅精闢見解。
規例三大變動
1.採用派拉利輪胎
主辦世界一級方程式賽事嘅FIA，幾乎每年都改例，將賽車規格左變右變，反而刁難到車手，今年除車架下壓力設計、KERS（動能回收系統）兩大新例外，最令車手緊張嘅係輪胎。今年由派拉利取代沿用20年嘅石橋胎，首先對車重前後平衡有統一限制，過往較高大嘅車手，毋須再加鉛落車身作平衡，唔同磅數車手嘅條件將更接近。
另外派拉利刻意減低輪胎耐用性，令抓地力迅速下降，對於咸美頓呢類狂野型車手，好似擦紙膠咁捽入彎嘅，咁就有大影響喇！相反如舒麥加呢類精準型車手，「慳」到胎變相減少入PIT時間，呢點好重要，情形如2010年澳洲賽事咁，JensonButton憑住52個圈唔入PIT紀錄，一舉擊敗咸美頓。所以今年車手多少要改變駕駛風格嚟配合新胎，過程充滿變數，賽事將會好刺激！
2.禁止採用DDD系統
淨係新胎已令賽事變得複雜多變，原來尚有兩大左右戰局嘅規格改動，首先禁止以往嘅DDD系統（雙層下壓力放大器），過往威廉士及Toyota等車隊走灰色地帶，將DDD改良而獲得不俗成績，今年FIA禁制咗DDD，改為距離前車不足一秒時，解鎖尾翼升起50mm這功能，以減低車尾亂流限速問題，以800米直路計，時速約可增加20km/h，即係多成百匹馬力！好彩大會規定每圈只可按一次，唔係就好似打《RidgeRacer》啟動加速咁屈機。
3.似混能車踩Brake叉電
第三項大改係加入KERS（動能回收系統），將落Brake時發出嘅高熱，轉化成電能儲起，當釋放時可爆發約80匹馬力，最啱出慢彎時用。呢方面威廉士技術比較好，硬件上比其他車隊可儲多一倍電，有機會喺對手叉唔切電下而提高優勢。大家同樣每圈只可按6秒KERS，不論一次用晒或分開爆都得。揸住地上最快賽車，仲要顧四條胎、升尾翼同KERS，如米高所言，今屆戰況會出人意表。
F1官網： http://www.formula1.com