遇着大牛市，唔少膽識過人嘅散戶會借錢炒股，但通常股市去到咁極端瘋狂，都係大跌前夕，好似金融海嘯前，就有唔少人借錢，甚至將層樓按埋去炒股。如果歷史循環不息，咁以下一段新聞，就真係幾令人擔心。
《中証網》引述廣東省某張都市報一則廣告，題為《牛市貸款炒股5萬貸20萬》。該報記者跟住廣告上面個電話打去了解，有位女士接聽，介紹有關貸款詳情。根據介紹，最低貸款額20萬人仔，不設上限，借幾多都得。貸款月息計，每月最低3.5厘，一借就要借1年，即係畀硬年息42厘。
貸款無上限須借足一年
大陸個市家陣係「牛皮市」，唔係「牛市」，邊啲人會以年息42厘借錢炒股？據報道，有兩種人會，一種係自認能得到內幕消息嘅人，另一種係莊家。前者聲稱知道某上市公司就有好消息要公佈，所以借錢買定股票等升。至於莊家就想搭高個棚，乘勢高位沽貨，喺搭棚過程中需要搵啲資金。
明知隻股票會升就梗係博啦，不過，呢個世界邊有嘢係絕對o架！有嘅話，就唔會有咁多人炒燶股搞到翻唔到身啦！