好多資源公司，都興搵猛人加盟，但吓吓唔係畀天文數字就係大量option，小股東無不一額汗。不過，噚日博軟（8096）宣佈，搵咗一位叫蘇生怡嘅先生做CEO，年薪390萬。由於未有成績畀人睇到，所以華華唔敢講算唔算平靚正，但至少都叫做合理，同埋證明間公司都係諗住「堅」搞石油唔係齋吹。
曾助ARCO拓中國市場
蘇生係何方神聖？行年55嘅佢係土生土長香港仔，港大畢業，去咗花旗國埃索（Esso）開展佢嘅石油事業，之後仲勁到離開埃索，同花旗ARCO石油公司成立合營企業，主要負責幫ARCO喺中國東南地區開發中下游業務，後尾ARCO俾BPPlc買咗，佢就去南美搞石油。
猛人華華梗係想識，但更有興趣想見到博軟主席余允抗。皆因余生係港產經典鬼片、華華睇咗十幾廿次都仲覺得好恐怖嘅《凶榜》導演。