我求大俠一向係熱情球迷，周一嘅意甲前列大戰AC米蘭對拿玻里，又點會錯過；不過，話就話大戰，但成場波A米都主導戰局，結果大勝3:0，班主貝佬嘅「哎吔」女婿柏圖，得到女友親臨聖西路撐場，就威到盡交出1個助攻1個入球；米蘭雙雄順利「歸位」排番1、2位，北強南弱嘅形勢，就好難改變。
芭芭拉開心到彈起
賽前拿玻里落後國際米蘭1分，贏波就可以搶番「2哥」位，更大大拉近同A米嘅距離，不過，如意算盤邊有咁易打得響；上半場拿玻里都仲頂得住A米攻勢，下半場就係主隊天下，拿玻里後衞艾朗歷卡49分鐘無端端禁區內手球，送個12碼畀A米，伊巴謙莫域一聲唔該就射入。
賽事最後13分鐘就係「鴨子」柏圖嘅天下，佢先喺77分鐘助攻畀奇雲保定近門撞入；3分鐘後就個人表演，由中圈推到去拿玻里禁區頂，巧妙咁遠射建功。柏圖女友，亦係班主貝盧斯科尼女兒嘅芭芭拉，坐喺觀眾席開心到跳起。
南部勢力無以為繼
A米教練艾基利賽後好風騷講：「12碼有冇枉判都唔會影響戰果，我哋係較佳一方，對手根本連射門機會都冇。」完成27周聯賽後，排名終於「正常」好多，A米領住5分高踞榜首，冠軍賠率由賽前嘅1.65倍跌至1.42倍，衞冕嘅國米就排第2。其實睇番近10季意甲，得00/01冠軍係嚟自南部嘅羅馬，其餘都係A米、國米同祖記北方3雄壟斷。今季南部球隊有過虛火，拉素排過榜首，拿玻里亦佔過一陣子次席，不過睇嚟都尾段乏力o架啦！
A米本土聯賽就威到盡，下場聯賽作客祖記唔失分，冠軍都幾穩陣；不過，下周中就要為歐聯16強次回合作客熱刺，今場打足嘅加度素就要停賽，睇吓柏圖可唔可以幫「哎吔」外父奇蹟反勝出線嘞！