馮仁昭四圍超：
肉蒲團女星當眾剝光豬做全裸廚神 - 馮仁昭

以靚女做噱頭嘅《美女廚房》大家睇慣睇熟，當時播出已經有人投訴話一班味之天使衣着暴露。不過最近就有成人頻道製作《冰火女廚神》，仲搵咗一個人體模特兒做主持㖭，就連外國通訊社都有到場採訪。
講到明係成人頻道節目，有份拍《3D肉蒲團》嘅主持張淨思（Flora）噚日要全裸上陣喺觀塘拍now成人台節目，佢話自己做過3年幾人體模特兒，自己對裸體已經好習慣喎，加上有36D身材，當然信心十足，不過Flora做電視主持就係第一次，所以佢話仲有好多嘢要學。

為出名六親不認

其實負責人話佢哋之前已經製作過日本同澳門版，遲啲仲會拍韓國同台灣版，今次香港版就會喺三八婦女節午夜首播，到時一班女權團體可能又會有好多意見。至於30歲嘅Flora就話自從拍咗宣傳短片之後已經喺討論區見到有兩極嘅意見，佢話：「不過好彩自己冇拍拖，同屋企人亦都冇乜聯絡，所以唔太擔心。」
Flora仲講到明話肯全裸上鏡都係想提高知名度，之前自己都係因為見到外國有好多好靚嘅人體藝術相而入行，又話自己最滿意背脊同對腳咁話喎。