預算案引發市民前所未有的憤怒，不少建制派中人均對財政司司長曾俊華有所怨言。有建制派中人分析，市民怒火迅速升溫的其中一個原因是，政府過去幾年忽略了中產怨氣，今次預算案就如一條藥引，引爆中產階層不滿，結果出現好像全民聲討政府的情況。
政府想法錯誤
該建制派人士批評，政府常有一種錯誤想法，以為中產有工作、有自顧能力，「政府只係要幫社會最需要嗰班人，而唔係有能力自顧生活嘅人」，但今天不少所謂中產並非甚麼大富大貴、年薪百萬人士，「喺政府家政策之下，一個四口之家月入逾16,000元已不可申請公屋，需要租住私人樓，近年樓價、租金不斷上升，他們經濟壓力也相應增加」。況且，對這些中產來說，物價上升造成的壓力，絕不會低於一般低收入人士。「佢哋好多人冇福利、又冇得往公屋，但係柴米油鹽加價，佢哋一樣要承受物價通脹」，再加上近日的奶粉搶購潮、樓價上升，最受影響還是一眾被政府視為毋須直接幫助的中產。
當中產一族發現基層有公屋免租、有綜援出雙糧，自己年年交足稅，卻連退稅6,000元也沒有時，豈不怒火中燒，「政府成日搞錯，以及退稅幾千蚊幫唔到中產，佢哋唔好以為中產真係生活無憂，好多中產都係『月光族』、每月人工冇乜點剩，再唔係要儲起幫仔女供書教學，多6,000蚊用，爭好遠o架」。
後果可大可小
更加令中產不滿的是政府注資6,000元入強積金，硬塞240億給基金界，「根本就唔係幫人儲錢退休，而係畀班基金經理搵錢」。
據悉，建制派、包括自由黨也收到不少中產投訴，強烈不滿政府忽略中產，自由黨迅速搞絕食，就是嗅到中產不滿升溫，明顯想爭中產選票。
該建制派人士直言，03年7.1有50萬人上街，與沉默的中產也要出來倒董有一定關係，今次中產怒火已點着，政府不盡快救火，任由這股怨氣積聚，後果可大可小。