是這樣的，陳奕迅出新唱片了，要拍幾支MV，其中一首叫「最後派對」的新曲，Eason特地找來太太及幾位好友去客串一幕party戲，我便高高興興的翻出那件買了幾個月都沒機會穿過的Chanelfunfur去贈興一下，正好在老死的重要場合中留個紀念。
然後工作照在微博世界流出（見圖），我便在自己的網頁中張貼了一下，想不到得到的其中一條回應竟是：
「Wyman，你熱麼？」
「噓寒問暖黨」
OK，其實我不應該說「想不到」的，我是完完全全想得到的（任何時候post張相便有），因為這種「噓寒問暖黨」我是常常遇上的，不但在微博的世界，就算在現實的生活中，即便是我以為「較明白遊戲規則」的時裝場合裏，還是會遇到許多許多除了「乜你唔熱咩？」和「乜你唔凍咩？」這世界便彷彿沒有第三句對白可以講的人，嗱嗱嗱，不要為駁嘴而駁嘴為懶醒而懶醒回我一句：「佢哋關心你啫！」我做人做了幾十年甚麼錯都仲會犯，就是不會好人當賊辦，紅血球還是白血球，關心你還是笑X你，還是分得清的，真正怕你熱親的人，例如你阿爸阿媽你好友你愛人，在這種情況下會講的應該是「要唔要除咗件褸呀？」或者「你着返件衫先啦！」而不會是懶識嘢懶有型的「乜你唔熱/凍咩？」
所以已經將這句話講了出口的無聊人，今日冇得走o架喇，我有嘢同你哋講。一次過清清楚楚講晒，此後再犯，面斥不雅！
給「噓寒問暖黨」的公開信
首先，你不是我，皮膚長在我的身上，我冷不冷熱不熱你根本不知道，亦不關你事，冷親亦不會冷親你，熱親亦不會熱親你，打乞嚏生熱痱都不會跳過隔籬，所以幾時輪到旁觀者依牙鬆槓？
況且有時單看相的微博友就能隔空感應也未免太神奇，生活在同一城市的網民尚且不知我拍照的時間為何年何日天氣為何，例如今次這一位「Wyman，你熱麼？」的發口痕朋友，我click一click才發現她是身處美國的（不用上我微博找了，我已delete她的留言，她罪不至被大家人肉），才更感吹脹，大佬，我拍這MV那天是2011年2月21日凌晨12點，地點有一半是太平山頂外景，那夜下雨，室外氣溫得7度左右，我着住那件假皮草啲衣料本來是用來做布公仔的，你話有幾保暖？你仲問「Wyman，你熱麼？」如果你嗰晚撞到我現場問我一定麼你老X！
OK，就算天氣真是錯得交關，例如明明大熱天時35度我才穿到紮糉一樣，或者真是冰天雪地我低V高衩再加大露背地去party，那麼也難免會有一下令人懷疑「這個人是不是黐咗？」，是是是，我明白的，這個世界無端端黐咗的人也真太多了，而且也太快太無聲無息甚至昨天還是好人一個的也有，但單睇着衫是看不出一個人神經有沒有問題的，你應該看看我有沒有無啦啦說自己正被FBI跟蹤，或者忽然在你的香檳杯中小便，否則我在35度着funfur就只是我的「藝術決定」，冇錯！喂大佬我都幾廿歲人唔通我冷定熱唔識分淨係你識分咩？咁熱我都仲着件厚衫出嚟人哋就梗係有原因o架啦，就梗係為個效果o架啦！唔通人哋1月着比堅尼行catwalk嗰啲，8月着16層古裝拍戲嗰啲又係唔知自己做緊乜嘢又係癲嘅咩？懶醒！
所以請你哋以後唔好用一種嘴角含春懶係好優越的姿態嚟同我講「乜你唔熱咩？」「乜你唔凍咩？」係啦係啦！叻啦叻啦！我知你哋係對氣溫好敏感啦！不過對於人情世故甚麼該做該講就唔係好sensitive囉。而且講到時裝，我不敢說你冇fashionsense，不過，我估時裝並不是適合你玩的遊戲囉！
「乜你唔熱咩？」熱！當然熱，但是為了個效果呀，時裝的功能不只調節體溫呀！
「乜你唔凍咩？」
頂！乜你唔煩咩？
Textby黃偉文
填詞人，其實最鍾意買嘢，最憎寫字，星期日盡可能唔寫字，去買嘢。
mailto:[email protected]
微博 http://t.sina.com.cn/wymanwong
本欄逢星期日刊出
