今個禮拜新片有《毛百萬》，行貨BD要暑假先出，但DVD照可聽杜比5.1，仲有阿葛、林狗嘅搞鬼聲演；雖然無1080p，亦清楚睇到毛百萬身上套蛇皮戰衣，以及迷你翁嘅毛髮細緻質感，啱晒一家大細煲碟。
記者：陳國輝
左穿右插試盡5.1
呢套戲主角唔係穿上白色緊身衣嘅胸肌男，而係又瘦又騎呢位醜八怪──毛百萬！講劇情，其實都係夢工場一貫反傳統情節，小朋友睇得開心，但大朋友睇完未必有驚喜；最值得留意，毛百萬身懷多種武器，例如縮水槍、變身手錶等，唔講仲以為佢係邪惡版叮噹㖭！
劇情內當然唔少得激鬥場面，片中出現多次空中格鬥，飛來飛去，穿牆過壁，用嚟測試屋企部5.1，效果照計唔錯。只可惜行貨暫時得DVD版，如果唔介意齋聽英語，無咗阿葛同林狗嘅搞笑聲演，不妨考慮買番隻美版Blu-ray頂住先！
逼真服飾
如果用隻DVD去試畫質，睇怕滿意程度有限！講到底，畫質未到全高清，而且《毛百萬》角色造型粗糙又簡單，若然睇畫質，可以改由服飾入手，例如主角身上嗰套蛇皮戰衣，我雖然未見蛇皮嘅紋理，但睇落好有彈性，十足改裝過嘅戰衣一樣；至於佢老友迷你翁，大家可留意佢手同腳上面嘅黑色毛髮，柔軟質感特別細緻。唯一要彈係女主角一身嘅普通裝扮，個Look已經好平民，加上衣服質感也平平無奇，一啲都唔起眼。
Bonus睇兩分鐘刪剪位
Bonus唔算豐富，只有英語版星級配音專訪、刪剪片段、新片預告以及夢工場動畫世界等內容，其中刪剪片段有成兩分鐘咁長，可以話補充咗劇情上未圓滿嘅地方，不妨一睇；但最可惜係無加插港版兩位星級配音員──葛民輝以及林海峰嘅訪問，作為香港觀眾，點都有啲失望！
Profile
畫面：2.35:1
音效：杜比5.1
特別收錄：星級配音專訪、刪剪片段、新片預告、夢工場動畫世界
價錢：$148（DVD）/$58（VCD）
