「光纖之父」高錕09年得到諾貝爾獎後，政府、學府同唔少機構都用唔同方法表揚佢。香港大學決定打破傳統，頒授一個名譽科學博士學位畀高教授，以表揚佢對和社會以至全世界嘅寶貴貢獻。
話係打破傳統，係因為高錕由87至96年，一直做港大嘅老對手中文大學嘅校長，香港咁多年來，絕少有大學頒名譽博士學位畀另一間大學嘅前校長。聽港大朋友講，高錕獲提名之後，審委會基本上唔使點諗已一致通過，佢係咪中大前校長根本無相干。聽聞高太黃美芸得知此事後好開心，應承下個月來港出席頒授禮，不過細節安排仲要傾，費事高老舟車勞頓咁話。
除咗高錕，港大今次一同頒授嘅名譽博士，份量都有番咁上下，好似大慈善家田家炳、終審庭常任法官陳兆愷、九巴同賽馬會前阿頭陳祖澤。