港股上禮拜連番下挫後，禮拜五期指結算日好友反攻，恒指反彈411點收市，重上23000樓上，報收23012，上周五花旗股市造好，港股今早有機會繼續炒上。
港股短線仍係上落市，支持位22500，阻力喺23400，個市仲係等緊消息突破。今日滙控（005）宣佈業績，盈利料會有理想增長，而投資者最關心嘅係股息，滙控會唔會調高派息先至係焦點，亦影響未來幾日港股嘅走勢。
中行C輪28620：中國銀行（3988）上日報收4.02元，升1.7%。股價之前跌穿250日線又反覆升番上去，上個禮拜再度跌穿呢條長期平均線，不過又隨即反彈，技術上日內有機會上試4.09元阻力，破位會進一步上試4.22元，可以買啲C輪28620短炒。
隻輪現價13.8仙，2011年6月27日到期，行使價4.18元，溢價7.4%，引伸波幅27.9%，槓桿率29.1倍（有效10.3倍），正股升上4.22元，28620睇23.8仙，正股跌穿3.94元就沽咗隻輪。
俊樺