保華集團（498）將喺兩個星期後舉行EGM，表決出售洋口港，又係時候。保華啱喺月頭公佈，出售祖國洋口港絕大部份權益（50.1%），總代價17.73億港銀，兼會喺3月14日EGM表決。計計數，洋口港為保華每股潛在變現現金，高達0.39元，高過集團現價0.315元。若果呢壇製作（包括EGM在內）順順利利，保華去到今年尾嘅變現回籠，好豐厚，日後亦繼續享受洋口港所剩餘近10%權益，帶嚟嘅增長成果。又就算保華經呢次資產出售後，無特別派送，集團keep住銀彈，去發展原有或其他新業務，一樣無壞。再講，保華經呢期調整，現價相對NAV每股0.97元，折讓高達67.5%，又係吸引到痹。呢轉博保華NAV收窄到50%，價見0.485元，保華現價講緊要翻半番，折讓仲係好吸引。
漢傳媒短打博升20%
漢傳媒（491）短短一個月，股價累跌咗過30%，日線圖9RSI跌到得番11，技術指標超賣到爆，而集團最新市值，亦跌到得番2.1億銀，場內靚仔啲嘅殼股，都唔止呢個價。再講，集團前排先公佈，計劃發展再生能源業務，繼續有point炒業務轉型。趁集團呢期跌得殘，雞仔注短打一轉，博漢傳媒升20%到0.21元，仲未有耐上到最新NAV每股0.247元水位。
錢雋