內地媒體噚日有篇招行（3968）嘅詳盡報道，主要係行長馬蔚華（圖）發表對招行嘅發展鴻圖，全篇報道最吸引華華眼球嘅，係入面訪問咗啲員工，講對馬行長嘅評價，最搞鬼嘅係話馬行長有「創新焦慮症」，視創新為生命，對創新有份狂熱，令招行上下都樹立咗「創新無止境」嘅理念。
仲有員工透露，馬行長每年大年初一都去分行見員工，話12年嚟無間斷過。佢仲差唔多每日都會上網睇員工論壇，據聞最經典嘅一次係，招行成功A股上市時，個個讚不絕口，點知員工喺留言版發表咗幾千字嘅諫言，提出招行今後何處去嘅問題，馬行長為此即召開會議討論，雖然馬行長睇得面紅耳赤，但係基於員工言之有理，佢後來表彰咗個員工。咁樂意聽取勸言，真係要畀個「like」馬行長！