前新聞之花魏綺珊告別螢光幕後，做過公關，之後轉戰舞台在演藝天地闖出一片天，近日鳥倦知還，八方聽聞佢會重返傳媒界，加入鳳凰衛視旗下香港台，相信大家不久之後就可以在電視機見到佢。
鳳凰衛視老闆劉長樂早前宣佈新嘅香港台下月底出街，係24小時粵語廣東話頻道，主要做香港同珠三角新聞、社會、經濟和文化消息，劉長樂透露會有多個名人加盟做主持同新聞主播，除咗魏綺珊，八方知道多個亞視記者、主播都會跳槽到香港台，今年傳媒界咁熱鬧，八方希望咁多位行家在新崗位工作愉快。
劉長樂都係亞視股東，亞視新聞與鳳凰衛視素有合作，記者轉到鳳凰順理成章。