俗語有云：矮仔多計，效力AC米蘭嘅巴西前鋒柏圖雖然唔算矮，有1米79咁高，但就好鬼有計；雖然之前負面新聞多多，搞到同太太比圖離婚，仲有指佢唔肯畀贍養費，個底花晒，但唔好理，最近佢又搵到新女朋友，仲要係玩姊弟戀，而呢個新女友更加係球隊老闆貝盧斯科尼個愛女芭芭拉，柏圖認真「識食」！
狗仔隊影到煙韌鏡頭
話說柏圖喺上場聯賽險勝基爾禾2:1後，入咗波嘅佢興奮到剝衫慶祝，換嚟一張黃牌，柏圖咁high，原來係要喺新女友面前「騷哥利」，而佢嘅新女友來頭認真勁，係AC米蘭主席貝盧斯科尼嘅寶貝女芭芭拉貝盧斯科尼。26歲嘅芭芭拉已經加入咗球隊嘅管理層，勢將接手父親大權，成為AC米蘭新主席，21歲嘅柏圖搭上咗芭芭拉，可謂衣食無憂，喺球隊嘅前途一片光明。
可能柏圖都知道自己個底花，所以將今次新戀情異常低調咁處理，不過神通廣大嘅意大利花邊雜誌嘅狗仔隊，始終捕捉到佢喺基爾禾場比賽當晚，同芭芭拉喺餐廳煙韌嘅鏡頭，兩個人喺餐廳出嚟之後，仲忍唔住激情擁抱，又喁喁細語，不知幾咁溫馨。
甜美太子女勢接掌AC
擁有一頭金髮長相甜美嘅芭芭拉，一向係老貝最為寵愛嘅寶貝女，佢甚至已經準備將AC米蘭交給這位集萬千寵愛於一身嘅掌上明珠手中。點知今次個女竟然搭上情場殺手鬼見愁，之前玩得人哋個女多嘅老貝，都幾頭痕。據報，其實意大利狗仔隊之前亦曾經拍到柏圖同芭芭拉激吻嘅鏡頭，但俾老貝快一步出錢買走咗啲相，所以兩個人嘅戀情先至冇被公開。
不過，計我求大俠話，老貝又唔使咁唔開心喎，因為芭芭拉亦唔係乜嘢純情少女，佢一早已經同一個名叫佐治嘅男人生咗兩個小朋友，之前亦曾經搭上AC米蘭前球員卡拿迪斯，或者今次係芭芭拉貪新鮮，想玩吓姊弟戀啫！