好鍾意入戲院睇戲要求嗰種投入同專注，人大了，視線更欣賞嗰啲長做長有、不多言但語出驚人嘅老戲骨。安東尼鶴堅斯、羅拔迪尼路及近期最愛《皇上無話兒》裏嘅謝菲路殊，上周首場特別場要坐到前排第3行都要買飛入場，只見呢位老傢伙魅力懾人，以下犯上又令人心悅誠服，喺我眼中尤勝爭最佳男主角嘅皇上哥連費夫，幸好，奧斯卡也設最佳男配角，希望佢下周一早上贏到。足球場上，阿二可悲；〈蘋果〉擂台版位有限，每月冠軍能金榜題名，亞軍無名。今周捧「兩阿」，阿仙奴同阿積士盃賽、聯賽齊發難。
活喺人家嘅陰影下，就算你有幾靚業績幾好口碑，都遭人白眼。阿仙奴喺國內畀曼聯、車仔恰住多年，講到踢法，一直話佢哋係地上最強巴塞嘅次級版，人哋華麗有價，兵工廠就華而不實；等了5年多，終贏到巴塞1次，終於來到明天的英聯盃決賽，這個本來微不足道嘅盃仔，去到2月尾仲有不可能任務叫4飛。英聯盃級數低，但今季對佢哋有極重要的指標，已等了5年半，教到第15個年頭嘅雲格也知擁躉心急想球會再嘗捧盃滋味；唔會理賽程密，同對手伯明翰級數低，必遣強陣攞個頭彩，爭埋其他3盃。不過莊家初盤開[-1]博「主勝」有2.2倍，我認為賠率偏高有少許戒心，不如試吓2:0，2:1，驚對手施積同施巴斯坦拿臣嘅死球威力入到波。法比仔唔出？有韋舒亞夠殺！
同阿仙奴一樣，歐洲兵工廠荷甲阿積士，每季幾乎將陣內最好球員賣走，成為自03-04年後，常入三甲但未贏過聯賽冠軍嘅主因；好彩季初已預咗蘇亞雷斯會走，呢條哨牙仔除咗喺世界盃打手球，年尾仲喺場上唔知係咪唔想留隊，專登咬人被重判停賽個多月；阿積士亦順勢上月將佢賣走畀紅軍，但球隊近期成績卻有回勇之勢，防線穩陣，前線有「雷斯替代者」、前荷甲神射手艾咸達奧，加埋明日之星施安迪莊同快馬蘇利馬尼，實力削弱少許但士氣卻得以重整；最重要睇過兩大勁敵，燕豪芬同川迪，好似比上季無乜進步，尤其燕豪芬賣走阿費利去巴塞，前仗輸畀海牙好肉酸，周中歐霸擒恨爭法甲多過呢個盃嘅里爾，用咗力贏來有疑點。目前阿積士只差燕軍5分，禮拜日場大戰賠率懸殊，同上周貼中飛燕諾唔怕海牙一樣，博[+1]同阿積士3.55倍冷W，追近啲！
上周末，英足盃話咗會爆，但原來不特止，冷風蔓延到周中歐洲賽及英冠英甲都大放冷氣，熱門客輸到擰晒頭，今周又如何？西甲下周開快車，兩強嚟緊3月大戰連場刻下傷兵多，本周繼續小心。英超上次走甩黑池冷W，今周作客狼隊有4倍，冷就唔怕追寶尾，玩條3串4射英冠卡迪夫城同葉士域治W，波友留意後兩隊下周中冇波打，埋今鋪得唔得？
正頭正路，不如今日頭兩場攞吓波本，日聯就快嚟，呢類長線波，開頭做吓功課好重要，今日先嚟超級盃熱身，鯨魚上屆小弟愛隊順利封王，鹿角正換血，難明點解莊家開平手盤低手。單注鯨魚，可串射今屆澳職新貴獅吼，水手首回合落後兩球，今場作客焗攻；但獅吼今季神勇，打埋呢場直入決賽，冇留力需要，今屆決賽遇邊隊都唔怕，篤定坐正，偏隅南方逞強，勝過埋首歐洲混戰！
蘋果波神
語錄：榜首戰賠率拉得遠，長賭冷門必着數！