支聯會副主席蔡耀昌（狗哥）去年領導普選聯爭取「終極普選」，與民主黨共進退，一齊走入中聯辦談判，亦一齊受部份市民批評，雙方同甘共苦，共度患難，最易見真情，八方聽聞民主黨最近與狗哥密斟入黨可能性，據聞成事機會唔算太細。
日前民主黨拉隊去港鐵請願，抗議港鐵事故頻生，赫然見到狗哥身在其中，唔少人仲以為佢已經靜悄悄與民主黨拉埋天窗。
狗哥澄清未入黨，解釋身為沙田民生連線召集人，與民主黨尤其係新東支部在地區事務上有長期合作關係，所以一齊請願事屬正常。佢又重申現階段未有入黨打算，但強調同民主黨理念相近，言下之意，呢宗婚事似乎指日可待。