誰人是香港第三位特首？今年是2012年選舉之前一年，有志者必須爭取認同，爭取選委支持。須知道選委會雖是小圈子選舉，但一位民望太差之人坐上特首寶座，中央雖然手握大權，也難擺平，而且北非有事，中東驚變，胡錦濤家鄉民歌茉莉花都可能成為禁忌之時，中南海要在小圈子內揀人，都要揀一位過得民意關卡嘅。更何況2012年贏得選委會嘅特首，在2017年如要連任，就要參加直選。
浸會大學民調無端端在三位「熱門候選人」之外，加多一位范太徐麗泰，而范太即刻成為民望最高嗰位，的確令原來領先嘅唐英年好尷尬，既然有六成民意支持，范太會否出馬？根據經常在馬會七樓跑馬嘅人士講，冇跡象噃，范太依家唔知幾生活寫意，每逢跑馬就在馬場以馬會董事身份請客，好多極少在馬場出現嘅政界、社會界人物，都成為座上客，對馬場及馬會增加瞭解，如范太因為得到60%民意支持而毅然參選嘅話，范太就要從馬會走入社會，與優閒講拜拜，擁抱緊張勞碌，犧牲都幾大噃，呢位人士就認為唔多似。
後來又見到一位政壇人士，佢更加唔信范太會競選，主要原因係范太今年六十六歲，明年六十七歲，如做滿一任特首，已經七十二歲，因佢曾經為了母愛而捐腎，自己都要愛惜身體啫，做特首好難捱o架，一日二十四小時oncall，捱五年已足以影響健康，佢唔信范太可以到咗2017還有意欲與精神體力參加特首直選爭取連任。但對中央部署嚟講，絕對唔想在2017搵一位新人與泛民對撼，因為在任特首參選，着數好多，勝算較有把握吖嗎。
政壇人物所言幾有道理。而且浸會大學民意調查捧范太出嚟，增加熱鬧啫，雖對唐梁兩人構成一啲心理壓力，對大局冇實質影響，唐山大兄自從抨擊八十後之後暫時退隱避風頭，反之振英哥繼續打鞭力追，呢場馬仲有得跑o架。