全城聲討預算案，基層、中產同聲討伐鬍鬚曾，八方日前去買叉燒飯，斬燒味個燒肉佬一邊揮刀一邊鬧鬍鬚曾，「邊有人咁蠢o架，錢都唔識派」。大家唔好以為草根冇錢落袋先至咁勞氣，其實富豪都唔多like預算案。
新Bentley埋單近600萬
話說有「新金王」之稱嘅金至尊老闆、全國政協委員黃英豪，月前以公司名義豪花500幾萬元買咗架新Bentley，佢強調係用嚟招呼生意夥伴，唔係自用。新車一月抵港，但因為要驗車而未完稅落地，黃英豪追問過點解驗車咁長時間，等個幾月都未用到新車。
直到星期三鬍鬚曾公佈預算案，黃英豪即時欲哭無淚，事關政府大加新車稅15%，佢架Bentley即時要畀多成100萬元先可以出車，埋單要近600萬元，雖則佢身家厚，但都覺得肉赤。八方相信黃英豪遲早搵得返，事關佢最近搞咗個luxury版淘寶網「淘至尊」，準備殺入大陸「撳錢」。