憤怒了！憤怒了！財爺鬍鬚曾公佈預算案後成為全民「公敵」，真係人人得而「豬」之，即係好似手機遊戲AngryBirds入面隻豬頭咁，係人都掟冧佢，要佢倒台，長毛、毓民同陳偉業呢「三子」未來日子大把機會出手，掟蕉、膠樽、苦瓜、白果、茉莉花同陰司紙後，下次應該掟甚麼好呢？
曾鈺成忽然會「三子」
上幾次開會長毛等人都向高官掟嘢抗議，事後政府去信立法會主席曾鈺成要求嚴肅處理，八方收到風，曾鈺成噚日約咗長毛、毓民同陳偉業食飯，喺呢個時間搞飯局，有咩好講呢？八方向來有幾多事實說幾多分話，因此不作揣測，直接問長毛與曾主席撐枱腳有咩好傾？
長毛話成餐飯「冇正經嘢傾」，四人純粹風花雪月，絕對冇傾過佢哋喺議會內嘅言行表現，更加提都冇提過掟嘢遭官員投訴問題，長毛更透露，其實日前會議上，曾鈺成已傳紙仔畀佢，表示會要求議事規則委員會討論議員開會期間嘅行為同展示標語問題，長毛即時寫紙仔交回曾鈺成，上書：「我為弄潮兒，豈怕濕青衫。」
長毛話曾鈺成收到字條後莞爾一笑，相信已經明白其立場同態度，「所以佢根本唔需要同我哋講呢啲嘢」。兩個大男人字條傳情，如果唔係長毛親口講，八方都唔敢輕信，而毓民亦指噚日飯局上只係與曾鈺成傾「閒偈」，「曾鈺成每年都同唔同黨派議員食飯，只係聯誼性質，冇其他目的」。
「離開個場都係議員」
佢又指曾鈺成十分知分寸，做主席如球證，只會在議事廳內行使權力：「離開個場，大家都係議員，食飯時點會傾掟嘢嗰啲問題？」佢又話因為大家都有默契飯局不談正事，所以先可以坐下來開飯，「如果官員要拉票請食飯，我哋唔會去」。
至於撐枱腳期間閒聊了甚麼，毓民話有談及近來社會政治形勢，八方問佢大家有冇一齊鬧鬍鬚曾份廢柴預算案，毓民稱飯局內容私人對話，不便透露，「總之冇傾到任何令大家唔愉快嘅事」。
mailto:[email protected]