呢輪講起「教育死結」，朋友之間愈講愈多，左丁山聽完之後，覺得香港原來真係有好多「老虎父母」，耶魯教授蔡美兒所講之TigerMom係存在嘅，與左丁山培養仔女之行為與辦法完全不同。譬如四歲就要仔女考劍橋YLE，考得唔好，再考，務求要在申請小一之時有portfolio喎，撞鬼，香港啲細路自小已學鋼琴、小提琴、畫畫、芭蕾舞，仲要催谷考劍橋YLE，個細路仲有無時間到遊樂場呀？
一位中環三十歲媽媽對左丁山講：「你out嘞，依家好多小學唔睇小提琴、鋼琴、英文o架，呢三樣視為必然，冇就唔好申請入學！有呢？因為個個學生都識齊三樣，唔會加分。所以唔少細路仔女要學埋法文或西班牙文，柔道或跆拳道，網球或游泳，吹單簧管等等，係要有齊十八般武藝，我個女現在一個月要用一萬元學習課外活動呀。」
左丁山聽見都暈得陣，不過啱啱收到一張junkfax推銷會籍，其中一樣係漢基（CIS）嘅入學債券（debenture，公司所有）叫價四百二十萬元，咁又好難怪啲父母緊張嘅，因此醒起兩位世姪女，一個係哈佛MBA/投資銀行家，一個係著名律師行律師，兩人同時放棄事業，回家湊仔，要等到兒子入咗小學，讀到小二，定下來之後，先至重返中環。
現代金叵羅咁厲害，左丁山諗番唔識字嘅阿媽，點樣教自己呢？除咗藤條炆豬肉之外，似乎諗唔起有甚麼招數。其實自己都未讀過幼稚園，一開學（七歲）就係讀小一，故此啟蒙老師問：「五個蘋果，食咗三個，剩番幾多個？」左丁山唔識答，對老師講：「我咁大個都未食過蘋果！」好彩老師好人，知道街上有好多失學兒童，居然收咗左丁山入學。現在識得以二十一世紀語言解釋，老師嘅問題，帶有文化差異性，對under-privileged（唔係poor呀）兒童不利，唔可以藉此「肥」學生！
呢日撞到一啲over-privileged學生嘅家長，佢地話英國寄宿學校要讀拉丁文與法文，香港學生讀得辛苦，返到香港放假就要搵補習，尤其是補拉丁文。補習費係每小時一千元。每堂要上兩小時。你識唔識得拉丁文呀，奇貨可居呀！
（更正：昨日本欄profolio一字，正確應為portfolio。謹向作者及讀者致歉。）