香港家長為培育子女成材，幼稚園階段就係咁使錢，至於效果如何，暫時唔知，起碼要十幾年之後，先知道香港富裕一代嘅學童會叻成點，或者會係高分低能，或者係屋邨一代仍然可以在本地官津地區學校爬到上嚟。至於舊式嗰套，冇咁多花臣嗰套，似乎成績唔曳，獲國際肯定噃。譬如一班家長發夢希望自己子弟可以入到去打工嘅麥肯錫（McKinsey）早在2007年九月已經發表咗一份報告，叫做"Howtheworld'sbest-performingschoolsystemscomeoutontop?"長五十幾頁，上McKinsey網站（SocialSector/Education/Knowledge）可以下載。
麥肯錫引用OECD嘅二○○三年PISA成績，世界上表現最好嘅教育制度就包括加拿大阿爾拔泰、澳洲、比利時、芬蘭、香港、日本、荷蘭、新西蘭、加拿大安大略、星加坡、南韓（以字母為排列次序），PISA係畀十五歲學生考嘅，即係一九八八年出生之學童。二十年前嘅幼稚園學生好似冇今日嘅幼稚園生咁緊張讀書呀嗎？佢地在PISA嘅表現值得香港自豪。
麥肯錫去年又發表一份報告，指香港係少數二十多年來持續被評為最優秀教育地區之一，綜觀全球經驗，老師質素與領袖才能（leadership）係最重要成功因素。隻字不提十幾年來各國投入數以百億港元計嘅資金嚟搞電子教育科技、電子教學。據一位有隨團去英國考察電子教學嘅朋友引述，陳維安在一個論壇發言後，一位英國人回應話，佢自己研究過近十年有關電子教學嘅報告，結論係冇任何可靠資料證實電子教學可以改善教學效果，近年嘅電子教學投資熱係政客與國際IT公司與「大有為」政府一同吹噓，一齊搵錢嘅結果！呢位英國人原來係CentreforBritishTeachersEducationTrust嘅顧問，上www.cfbt.com可以知道多啲。
大家趕時髦之餘，家長唔駛驚自己子女唔夠物質條件，被人拋在後頭，畢竟讀書，讀好書之權，操諸在我，熟讀唐詩三百首與古文觀止（古德明所言），中文點會唔好呀，使乜怕人地搵補習老師！香港嘅教科書具世界水平，勤力去讀就不會落後於人，香港教育係叻過英國美國o架，至少麥肯錫好肯定香港教育過去二十年係得嘅。