「打波先嚟落雨，唔通連個天都唔鍾意我！」講緊嘅，好可能係首次領軍羅馬嘅前意大利國腳蒙迪拿（右）。星期三晚地標戰，飛機仔領作客嘅羅馬，憑迪羅斯45分鐘一箭定江山小勝博洛尼亞。雖然話賽期同歐聯撞期，冇乜人留意，但最意外就係連馬會都冇為呢場意甲開盤。話時話，「飛機仔」36歲就接替雲尼亞里執教首都球隊，外界一般認為屬過客居多。之不過今次連馬會都唔理佢嘅地標戰，我求大俠問過馬會，唔開盤其實有原因嘅。事關博洛尼亞對羅馬場波，其實係上月30號嘅意甲延續，當時踢咗16分鐘因為風雪腰斬，噚日呢場係補賽。馬會發言人話，由於賽事唔夠90分鐘，所以冇開盤，咁即係冇玩針對啦。「飛機仔」，我求大俠贈你一句：「生命滿希望，前路由我創。」