豪無疑問，iPhone已經成為唔少人的「精神食糧」，遊戲類型多到乜都有，搞到屋企部PSP封晒塵！iPhone最正嘅地方係千變萬化，周邊配件越出越多，最近仲出埋老虎機，以後唔使過大海咁麻煩！
記者：王震遠
攝影：梁細權
Model：[email protected]
介面極像真
iPhone除咗係電話，佢仲係半件賭具！新年一役，骰盅、麻雀、鬥地主……真係諗到嘅、諗唔到嘅乜都有。不過下下手指指，真係少咗幾分實在感！JCShop啱啱新返JackpotSlotsAppcessory，多支棍仔即刻唔同晒！介面靚似過大海嘅老虎機，已令人好投入，拉棍細心到曉回彈，同打牌一樣，有手感囉！
唔使捽芒都玩到嘅原因，係機座採用插Slot設計，一經裝上，仲自動提你裝「自家」老虎機App─《JackpotSlots》。遊戲雖則免費，不過要成20MB，幾大咬！建議用Wi-Fi下載會快啲、穩啲！
澳門賭場老虎機款式勁多，呢隻遊戲亦一樣，除自家銀仔版本，仲有傳統版「三條7」。雖然贏嘅只係虛擬金幣，但如果你贏滿50,000個就可以參加機內ReelWeekendCasinoGetaway大抽獎，頭獎係價值2,400美金嘅拉斯維加斯機票連酒店住宿，不過當然仲要抽籤啦！你估咁易中，咁易買餐餸！
後插4p彈珠機
小白版iPhone4等極未出，見到呢部插件式波子機，感覺零舍養眼！咪睇佢麻雀雖小，但遊戲選擇掣、拉桿射球，以至左右球板，完全同真波子機無異；一樣係一經裝上，就會提你裝佢個免費App，方便到極。最開心係遊戲最多支援四個人玩，同真實波子機一樣，有計分比賽制，一班人特別Happy！
遊戲基本同真實版無分別，目的要將彈珠撞向唔同區域得分，撞嘅時候仲有音樂同燈效，投入度大增！千祈咪睇小呢啲積分，遊戲預設咗三個隱藏關卡，要儲夠分數先可以開啟，咁就唔使齋㩒咁Dry！
查詢：31022783（JCSHOP）
百變i瘋熱
打手槍iPhone
呢支手槍由外國網民oneJuniorTan自製，扳雞唔會射部iPhone出嚟，純粹無聊，真身只係一個放唔到落袋嘅Case。想像一下聽電話時個趣怪樣，吓女仔一流。
iPhone藍芽手掣iControlPad
個㩒掣擺位，真係有幾分似XperiaPlay。佢透過藍芽連上iPhone，從此有齊打機十字掣、Analog同基本按鍵，唔使再㩒芒！美中不足係要JB先用到，後果自負喇！
參考： http://www.icontrolpad.com/
爛GAG變真機
iCADE由美國潮物網店ThinkGeek公開，本來只係搞爛GAG，點知突然又喺CES2011上宣佈推出這台iPad配件，仲同電玩廠Atari合作，真係可以打到經典街機。
參考： http://www.ionaudio.com/icade
少輪電話
潮流久不久愛倒轉行，忽然懷舊當時髦先夠型，呢部iRetrofoneBase嘅設計師就深明呢個道理，將時下最潮嘅電話，改製成阿媽時代設計，不過少咗個輪，始終爭啲喎！
參考： http://www.etsy.com/listing/45436168/iretrofone-base
