林峯chok樣chok到出晒名，搞到佢堂妹林夏薇之前都成為追訪對象，外間仲話薇薇索過林峯胞妹，噚日薇薇殺入模界，聯同麥浚龍個模特兒女友Janine同JessicaC.嘅模特兒男友Sergio一齊去金鐘做手錶騷。
靠自己實力
薇薇唔知係咪有堂阿哥過幾招，好識得應對傳媒，對答又有禮，唔知佢會唔會借勢入埋無綫？薇薇話：「暫時冇諗，自己仲要做舞台劇。」儘管薇薇話佢哋一家人都靠自己，因為有成就感會開心啲，但薇薇人氣急升，多少都同chok峯有關。
薇薇仲當正堂哥係偶像咁支持，一講到林峯chok樣時，佢就話：「佢喺我心目中不嬲都好靚仔，亦係好阿哥，永遠都支持佢。」薇薇又唔相信林峯有整容，直頭好似忠實紛絲一樣，但林峯胞妹就慘，俾人話似王祖藍，對此薇薇話：「都有啲傷心，我哋一家人關係好好，家姐都好善良。」
Jessica有回報
同場嘅Janine今年同男友麥浚龍度過首個情人節同新年，佢話大家未到見家長時候，所以冇互相去對方屋企拜年，而情人節就有食飯慶祝。JessicaC.男友Sergio好少自己一個人工作，提到好多女仔都會花好多錢喺男友身上，Sergio話唔介意，又話女友對每個人都好好，亦相信只要付出就會有收穫，更話會將愛回饋女友，認真抵錫。