吼阿仙奴周三在英超主場小勝史篤城開「和」，原因不僅相信阿仙奴會為下周日的英聯盃而作保留，最重要是史篤城遇強越勇，甚少大敗。阿仙奴這3分可手到拿來，過程可不會輕鬆。（球賽編號：星期三4；有線203及301台明日3:45am直播）藍鑽石
爭取4冠路途遙遠，但既然形勢不差，阿仙奴決不會放棄，多位在上場英足盃對奧連特收起的戰將，包括攻擊核心法比加斯、拿斯尼、尹佩斯等都會復出領軍，而佐羅將會復出夥拍哥斯尼鎮守中路，不過本身有傷的戴亞比須續坐波監，整體陣容仍算完整。兵工廠已主場6連勝，連巴塞隆拿來訪也得敗走，區區一隊史篤城來訪如何不俯首稱臣？
史篤城今季從未大敗
話雖如此，阿仙奴始終有英聯盃決賽撲擊伯明翰的後顧，在比賽中後段應有所保留。再者，史篤城非強隊但又絕非弱旅，今季從沒在任何比賽輸波多於兩球。
從阿士東維拉借來的卡維早已融入球隊，至於後上的賀夫偶爾助攻得手，阿仙奴豈能不防？另外，史篤城踢法硬朗（這點可從該隊本季已累積46黃2紅證明），去年梳爾哥斯踢傷艾朗藍斯一幕歷歷在目，阿仙奴兵與這爛打球隊交鋒，說不會避重就輕是騙人的。
故此，即使史篤城是役有對白禮頓時受傷的艾法寧頓難望披甲、薛迪比續養傷，面對阿仙奴也未必大敗；說不定還可趁敵人不備取得入球，波膽取阿仙奴小勝2:1。
星期三4
阿仙奴vs史篤城 2:1
半全場：主/主
盤口：阿仙奴[-1]
讓球主客和：D和局
《花絮》
阿奴躉下周日旺角開party
相信一眾阿仙奴躉，都期待嚟緊禮拜日場英聯盃決賽，話晒呢個係5年嚟隊波最接近嘅第一個獎盃。阿仙奴亞洲官方球迷會當晚會喺旺角一間酒吧搞個決賽睇波party，講明「百人狂歡慶祝我廠捧盃」、「一起見證我們隊長高舉獎盃吧」。個party喺當晚11點開始，有興趣可以e-mail到[email protected]，或者致電96245103查詢。
兵工廠又拔巴塞苗
阿仙奴03年「偷獵」巴塞青訓產品法比加斯，埋下雙方牙齒印。據英國《太陽報》報道，阿仙奴又對巴塞16歲中場新星托拉爾夏柏（JonMiquelToralHarper、圖）起痰，想照板煮碗偷獵呢位西班牙U16成員。巴塞會長羅素得知事件後好嬲，歐聯16強首回合喺阿仙奴主場，更怒斥阿仙奴行政總裁加斯迪斯㖭！不過托拉爾夏柏因為母親係英國人，對加盟阿仙奴好有興趣，據報已經達成協議，巴塞收番35萬歐元轉會費！
卡維賣口乖讚新東家
喺挪威前鋒卡維（圖）嘅足球生涯，已經唔止第一次被所屬球會外借，每次都有貨交，好似年前借去羅馬有好表現，家陣由維拉外借到史篤城亦唔失禮，繼聯賽贏新特蘭為球隊扳平後，上場英足盃對白禮頓又先開紀錄，威到盡。佢名副其實係世界仔，話明喺史篤城嘅生活冇得再好，言下之意已經將維拉拋諸腦後，呢啲咪係識撈囉！
拿斯尼續約拖住先
曼城、車路士呢排開天價周薪，搞到出現連鎖反應，其他英超球會想同麾下球星續約都唔係易；阿仙奴月初就開出75,000鎊周薪嘅5年合約，想同法國中場拿斯尼續約，原本成事機會都好高；但拿斯尼最近接受體育雜誌訪問時表示，要留番季尾先決定。23歲嘅拿斯尼得番16個月約，而且有傳佢想轉到巴塞，如果今年夏天都續唔成約，恐怕阿仙奴都被迫平價賣走佢。
最新消息
阿仙奴領隊雲格於英國時間周二下午發放最新軍情時表示，前鋒尹佩斯因為拉傷腿肌，無法於周三英超對史篤城上陣，中堅哥斯尼亦因背傷避戰。不過，兩人有機會趕及下周日英聯盃決賽對伯明翰復出。