由國寶級導演張藝謀執導、講述南京大屠殺嘅電影《金陵十三釵》，被譽為係投資最大嘅國產華語片，套戲家喺南京密鑼緊鼓開工，飾演神父一角嘅「蝙蝠俠」基斯頓比爾（ChristianBale）亦已經去到當地開工。
唔用替身
內地記者就喺上星期六影到為角色留咗鬍鬚嘅基斯頓，佢着住厚厚嘅羽絨離開下榻嘅天生橋山莊酒店趕去開工。據內地傳媒報道，呢位荷李活演員拍攝時非常投入，雖然導演為佢安排咗一個替身，但到目前為止嘅所有動作場面，基斯頓都親自上陣。
另外，據《金陵十三釵》嘅製片張偉平講，因為基斯頓已經入圍咗今屆奧斯卡最佳男配角，所以遲啲會同劇組攞一個禮拜假返美國出席頒獎禮。
放棄休假
不過，基斯頓呢位外國大牌亦都好識做，原本合約依足荷李活規矩，寫明每日工作唔可以超過8個鐘，一星期仲要有一日假。但係基斯頓就曾經主動放棄咗一日休假幫張藝謀開工，算係還一個人情畀導演。其實基斯頓已經唔係第一次喺中國拍戲，佢9歲時參演嘅第一部電影《太陽帝國》亦都喺內地取景。