FastFashion世代　搵衫易搵食難

作為80後的香港女子，求學時期的時裝世界，除了校服還有甚麼？經常逛是加老威或花園街小店，經常着的是佐記及堡記出品，經常混吉I.T連卡佛。但近年情形出現劇變，外國「速食時裝」品牌如H&M、ZARA攻陷香港潮界，聞說今年GAP及Forever21更將着陸香港。

記者︰吳美美
攝影︰楊錦文
Model︰Reila@Starzpeople

抄襲？惠及平民？

源自美國的兩大速食時裝品牌GAP與Forever21預計將於今年下半年着陸，又多兩個外牌到港搶飯碗。本港時裝業餅仔越來越多人分，無論是街邊小店、外國大牌定本港高級連鎖店都要驚定先！速食時裝（又叫FastFashion）講明快、靚、正，抄款抄到無晒譜：過去所謂「抄款」，就是花園街檔boutique仔會「參考」《non-no》或《spring》等日本雜誌，跟圖出款；家陣外國速食品牌專業好多，如ZARA就有一團隊，每年走訪巴黎米蘭時裝展，一見有啱心水靈感到即時畫sample拎去工廠大量生產，10至12日就可以起貨，完全大「跟」特「跟」，你喺天橋上見到的心愛短裙，可能最平$99有交易。當然，抄襲之下亦有風險，就是大牌會告平牌侵權，早前就有AnnaSui及DianevonFurstenberg控告Forever21抄襲她們設計的碎花裙，但是設計呢種概念好主觀，又可以告得幾多次呢？無疑這亦留下一條伏線：我們這樣子追捧經常抄款的FastFashion，又是否尊重時裝？

貴牌出招抗敵

時裝大趨勢已經存在由Hi-Fashion走去FastFashion的情況，就算買開貴牌嗰批人都會走去買平嘢用來mix&match。FastFashion的優點完全蓋過了「三衰」：衰用料、衰剪裁、衰易撞衫。最慘是，香港又經過金融風暴兼經歷港幣縮水，買貴牌惟有留畀自由行同胞們去負責。
高級時裝有何妙計抗敵？難道要學H&M搵人crossover，出個LV×GUCCI手袋限時搶購？舉例一︰Burberry就以資訊科技抗敵，在去年的春夏女裝fashionshow舉行當日，同時宣佈retailtheatre，被邀賓客可在店內，即時透過螢光幕看show，再提供iPad即時預訂當下新裝，貨品將在七周內寄出，此舉起碼留住了愛快而又消費得起的潮人。舉例二：唔少貴牌密密推出名為「紅線」「橙線」等多條副線，務求將價錢拉近，變相減價留住客源。說到底，一個顧客鍾意AnnDem皮褸，總不會無端端走去件買款似的Forever21，因為品牌背後理念、質素、感情都對消費者有影響。

■H&M長玩同貴牌crossover，去年就搭上LANVIN，再度引發港女瘋狂掃貨。

中價牌被迫轉型

唔好以為賣平貨無肉食，其實係可以賺到喊！例如誓要做FastFashion龍頭的GAP，2009年銷售額有103億美元（約802億港元），ZARA2008年銷售額有109.7億歐元（約1,168億港元），H&M於2010年銷售額就錄得1,080億瑞典克朗（約1,314億港元），如此豐盛的紀錄，多得大家無論放工、放假、節日都嚟行一轉，下下掉低幾百元。
就係佢哋賺到喊，先可以頂得住香港貴租。你哋有否覺得平牌的開賣位置往往是名店林立的城中黃金地段？還一來就開個幾萬呎又幾層高的旗艦店，擺明車馬搶客，內裏由化妝品至大肚婆衫都有，盡量每個階層每種年齡的消費者搶得就搶！香港租金高昂，惟有外國大財團才能支撐，講真，曾幾何時風光過的Benetton、SISLEY、ESPRIT、佐丹奴、Bossini有些棄港北上，有些即使駐港也轉攻自由行。所以速食時裝不只分了大牌的餅，還有中型時裝的生存空間。

■有無發現即使新開季，部份中價時裝店已開始做sale？

Celia（時裝店主/stylist）：「我覺得係唔係抄款好難講，始終時裝每季都有一個trend，有hititems，平牌肯定係跟大牌行，呢期hit邊款，通常周街都有，情況好正常，所以會話佢哋抄。而且貴牌始終有其好處，質料、剪裁、着上身完全唔同，平牌最多得個look。」

I.T集團傳訊經理Gloria：「我覺得貴牌同速食牌兩者之間唔會有太大影響。例如我哋旗下有不同類型牌子，即使本地設計如izzue、b+ab喺香港十幾年，始終有批loyalty的顧客。而且我哋提供有質素的服務、VIP優惠、靚裝修，呢啲係平牌做唔到嘅。」

不欲上鏡的MAPLE負責人：「數據上嚟講對我哋係無影響，2010年收入比2009年更好。始終國際品牌的針對性無咁強，唔同我哋是就香港人口味來設計。所以就算附近有類似品牌，收入都無大影響。而加連威老道分店由三間變一間亦只是我哋不想做得太濫，希望將質素形象提高！講真，做生意幾時都有對手。」

BEBOP（THINKSILLY網上雜誌總編輯）：「FastFashion價低、貨品選擇多，但對Hi-Fashion本身衝擊唔大，因為大家所得到的滿足感唔同。情況就有點似當年網上版報紙、雜誌預計會取代印刷版本，但最後都無。其實多咗咁多平牌到港，令市場多元化係好事，起碼想搵basic有quality的衫款選擇上會多咗。例如UNIQLO，又平又襟着，款式多又唔會設計無厘頭，以前要搵好難，我覺得平牌唔代表無質素。」

速食時裝入侵史

■2004年ZARA抵港，源自西班牙。

■2005年UNIQLO抵港，老家是日本。

■2007年H&M抵港，總壇瑞典。

■2008年CottonOn抵港，乃澳洲朋友。

■2010年Monki抵港，瑞典爆出，設計師是港人。

■2011年美牌GAP重返香港，預計年中中環開業。

■2011年美牌Forever21，傳聞8月銅鑼灣開業。

題外話︰OnlineShop搶灘

Hi-Fashion唔單止要抵檔FastFashion不斷殺入，仲有網上時裝生意的興起亦搶了她們的一忽肉。死硬派如小記，曾揚言無試過着上身的衫褲鞋襪都唔會買，但亦經不起onlineshop的瘋狂減價，一件毛毛仿皮褸先至二百幾蚊港紙，尺碼又有詳細解釋，仲有買過的人畀意見，運費買幾多都係同一價錢，好難唔令人失陷！家陣GAP同ZARA都設有onlineshop，前者從大陸寄貨來港都係每單收$36，抵到爆！