財爺今日公佈下年度預算案，其中一個重點係增加地皮供應壓住樓價，未來一年可能個個月有官地拍賣，身為行會成員嘅「新界王」發叔，都響應政府措施，加入土地供應行列，鄉議局年內可能放售九龍塘金巴倫道局址地皮，趁市旺套現。
新大樓建築費1.8億
去年九龍塘義德道誕生兩幅地王，毗鄰九龍塘港鐵站嘅鄉議局總部肯定十分值錢。鄉議局捨得賣地，係因為位於沙田石門嘅鄉議局新大樓已接近竣工，擇日4月2日入伙，5月啟用。雖然新大樓建成，不過細屋搬大屋，唔見嘅點止一籮穀？
據講新大樓建築費用達1.8億元，而鄉議局過去幾年出「行」力籌款，尋遍本地富豪、海外鄉親，共籌到逾8,300萬元，成績雖然唔錯，但仍未足以「埋單」，因此需要設法求財，左計右計都諗唔掂如何在短時間內搵到一億元回來，鄉議局無計可施，因此決定出售九龍塘局址地皮套現。
八方聽聞鄉議局為準備興建新大樓，幾年前向銀行貸款7,000萬元，家尚餘2,000萬現金左右，估計可應付未來兩、三個月開支，因此需盡速變賣九龍塘地皮籌足尾數。發叔噚日稱，籌款工作已經做到「七七八八」，揼得心口、願意捐錢嘅人都已經慷慨解囊，惟今之計係賣地，否則別無他法，佢又指下半年香港經濟會比較波動，所以放售局址宜早不宜遲，相信越早放個價錢越好。
執委提議公開拍賣
發叔投資房地產經驗豐富，家族睇準時機摸貨賺錢成績有目共睹，佢拍板話要趁市旺賣地，相信都冇乜差錯，至於點樣賣則未有定案，有執委提議公開拍賣，亦可公開招標，而無論呢個72年就成為鄉議局會址嘅地皮賣得好唔好價，新一屆鄉議局執委都會喺沙田新大樓辦公。八方知道入伙吉日會按傳統有大鑼大鼓舞獅助興，亦會喺大樓外空地搞千人盆菜宴，款待出錢出力嘅鄉紳父老。
至於新一屆鄉議局仲係咪由發叔掌舵？佢笑笑口話天下無不散之筵席，話全港有700萬市民，毋須擔心接班問題。
mailto:[email protected]