暫列港甲榜首嘅傑志，以引用西班牙教練及外援，兼踢法細膩而贏得「港版巴塞隆拿」嘅美譽；傑志5月就會用7位數字戲金，邀請暫排西甲前4嘅維拉利爾，喺大球場踢番場「翻版西甲大戰」，到底「港版巴塞」vs「正版維拉利爾」，有冇得打呢？
維拉利爾為傑志賀壽
傑志總領隊伍健（Ken）周二就喺facebook公佈呢個消息，Ken哥話今次得到球隊教練甘巴爾搭路，邀請到維拉利爾嚟香港，為傑志80周年賀壽；戲金為港紙7位數字，黃色潛艇就保證強陣來港。即係如果冇傷冇病，巴西國腳尼爾馬、意大利國腳基奧斯比羅斯、西班牙國腳辛迪卡索拉同卡迪維拿等都會訪港。
維拉利爾今季戰績都唔錯，現時排名西甲第4，又打入歐霸盃32強；不過Ken哥話，就算維拉利爾入咗5月18日舉行嘅歐霸盃決賽，都唔影響訪港行程。以傑志季初到西班牙集訓，都唔夠維拉利爾嘅B隊打，可見正牌軍實力深不見底。
傑志對維拉利爾暫定5月26日（星期四）舉行，Ken哥都話要多謝羅傑承先生幫手；事關5月25日係亞協盃16強賽期，如果南華或飛馬小組首名出線，呢日就係主場比賽；但羅生唔堅持外隊訪港要「前七後七」（本地賽前後一星期不能主辦外隊比賽）嘅規矩，幫到大忙！由於傑志仲傾緊贊助，門票價格未落實，但Ken哥希望門票大眾化，吸引更多球迷入場。
歐洲勁旅今夏輪住東來
其實今夏唔少歐洲頂級球隊都東來，除咗車路士、阿士東維拉同布力般流浪7月嚟香港參加英超挑戰賽外，「銀河艦隊」皇家馬德里亦會訪華。
據《阿斯報》報道，皇馬將喺7月尾先到美國集訓，然後到中國兩大城市北京同上海踢兩場表演賽，據聞戲金每場高達500萬歐元（約5,280萬港元），條件咁辣，香港都好難搵皇馬再嚟喇！
傑志近年外隊賽成績
11/08/07 0:4負巴塞隆拿＊
04/06/05 2:2和祖雲達斯（互射12碼勝5:3）
18/07/04 1:1和紐卡素（互射12碼輸6:7）
30/05/04 2:1勝AC米蘭
＊與愉園組成聯隊出戰
資料來源：《蘋果》資料室