有料爆，有料爆！企業傳訊界「靚仔」鼻祖、新世界集團企業事務總監關則輝就快起身唔撈！
輝哥仲係壯年嗰隻，好哋哋點解起身呢？輝哥話，冇咩特別原因，大家千祈唔好諗多咗，只係人生行到某個階段，就係時候諗長遠啲，同諗下一步想點，所以有咗呢個唔do嘅決定。佢話，加入咗新世界集團都13年，係時候takeabreak先，嘢就一定會繼續做，因為要食飯嘛，但係暫時真係未有着落！
係時候takeabreak
輝哥又話，佢係喺農曆年前遞信嘅，老闆都有留過佢，之不過千里之行又踏出一步，睇吓有咩轉變都係好事嚟嘅。佢又話，家陣仲未搵到人接佢棒，但係唔使驚，佢起身係要幾個月通知嘅，仲有大把時間搵人。
回望喺「新記」嘅十幾個寒暑，輝哥話係一件好開心嘅事，有好多好難忘嘅回憶，好似剛剛入去嗰陣，佢就花咗5個月接手搞一架巴士都冇嘅新巴。嗰陣好多人都覺得好牙煙，之後佢又用咗4個月去接手搞新渡輪，後尾又整單紅灣半島……真係是但一單都夠佢講半日！
查實輝哥絕對係香港傳訊界奇葩，海、陸、空佢都做過晒，淨係未試過做地底咋！咁takeabreak嗰陣會搞啲乜？輝哥話，佢最希望係發放多啲正能量，感染埋身邊嘅人，令大家都開心啲；家佢喺《溫暖人間》（香港一本佛教雙周刊）有寫吓嘢，已經開始發放緊正能量……華華好欣賞輝哥嘅舉措，之但係，如果輝哥能夠抽空過啲正能量畀華華，咁就更加功德無量，阿彌陀佛！
mailto:[email protected]