過去30年，高達一直未Out過，久不久又有新機體登場，真係長做長有！等咗30年，中國終於有──四川高達！可惜點講佢都只係老翻，一出馬上俾日本人控告；唔怕死！國色天香園再將佢變臉上架──天香號MarkII，而Gundam網民亦齊齊起哄，將佢惡搞Chok靚個樣，化身模型、漫畫又動畫，真係越叫唔好越要做！
記者：王震遠
天香號揚名海外
近日網上流傳有個新高達機體登場，仲有1:1模型屹立於成都國色天香園，網民稱呼呢台機叫「四川高達」、「天香號」，仲揚名海外上埋日本電視台，拎佢同靜岡縣嘅高達比較。
原來講開有段古，呢台山寨高達當然唔係原廠出品，原本係國色天香園為咗招攬更多遊客而建成嘅「疑似」高達，明眼人一睇就知有九成相似，結果換嚟日本公司控告。
國色天香園膽識過人，本以為會拆走初號機，結果迅速改裝成「天香號MarkII」，外形改到奇奇怪怪，網民揶揄「天」面上加上渣古喉，身形似老虎，唔知好嬲定好笑！唔少網民更實行曲線支持，結果就連日本動畫迷，都忍唔住借呢台高達，Chok出一個型版機體，流傳出大量改圖同短片，哄動中日班ACG迷（Animation、Comic、Game縮寫）。
惡搞高達 越搞越惡
國色天香園出過山寨版高達，網民將佢再山寨版，呢個惡搞機體真係越搞越惡。不過改完真係有番幾分霸氣，唔知B廠會唔會考慮收購呢款機呢？
靚執概念系
網民力撐下！幫佢走入收身堂兼變靚啲。如果出模型，小記都想買番隻玩吓！
惡搞變面系
超級機械人化，兼惡搞佢個造型，令佢日本商品化，可能網民想將天香號納入高達體系。
亂真漫畫系
網上同人、同好，將天香號漫畫化，全部背景、造型都係高達經典場面，以假亂真！
OP動畫系
有深愛天香高達網民，竟然郁手做出40秒嘅遊戲版OP，超勁！
http://www.youtube.com/watch?v=lU0p670qbgA
三尖八角 屎橋細路
身為高達Fans，去過日本搵正版高達朝聖嘅Pelo就睇唔過眼：「四川高達我有睇過，不過都係喺YouTube上面；對條片無乜感覺，因為一直以嚟睇過好多內地做嘅同類型動畫，不過佢只係用咗高達個名，無乜意思！」
有網友話天香號係高達同老虎合體，Pelo唔多贊成：「佢完全唔係一部高達，身上面有一條兩條刺咁凸出嚟，完全脫離晒高達設計，可能某啲地方有少少高達元素！」高達機體設計一向型仔，任網民點幫佢Chok靚樣，始終無得救：「三尖八角只為細路仔，根本係以前日本七十年代常見嘅誇張手法囉！」
