潮流興合併，但係噚日港交所（388）發表嘅最新統計資料顯示，香港好似李君豪話齋，真係唔使跟風，都一樣咁多國際股民幫襯，生意唔憂做！
港交所調查指出，喺2009年10月至2010年9月期間，外地機構投資者佔市場總成交金額，比起上一個年度又升咗4個百分點至42%；而本地散戶比重就跌咗4個百分點至21%。
海外投資者當中，相信因為歐洲債務危機，當地投資環境仍然欠佳，期內嚟香港投資嘅英國投資者顯著增加，升咗7個百分點至29%；另外嚟自歐洲大陸嘅投資者，就升咗6個百分點至16%。
反之，美國經濟開始復蘇，美國投資者返家鄉買股，喺香港佔比反而下跌咗12個百分點至24%；而大陸同胞佔比就維持喺11%左右水平……所以，使乜同人合併呢！