香港人出名識嘆講享受，有錢唔會收收埋埋，物質上的滿足，都係獎勵自己嘅途徑，所以香港豪華房車才多得如天上繁星，不過繁星只可遠觀，豪房車先可以帶嚟官能上滿足，可能車廠都認同呢個理論，所以如奧迪這款A8L先至將華麗外形、豪華配件全晒喺佢身上，務求令你面子十足。
記者：趙慧敏
攝影：伍慶泉
Model：Rika@GMEModels
鑽石頭燈豪閃
今次並非我與A8L初次接觸，初次邂逅是在德國車廠安排的試車活動上，老實說，對我們這類平民百姓來說，與A8L首次相遇，已深被其外表所吸引。事隔數月，今次再在香港重逢，竟然給我另一種的感覺。記得在德國試車期間，綿綿不盡的公路，令人着眼於其性能及速度，不過當A8L駕臨香港，似乎任何一段公路都無法將其性能發揮至極限，既然如此，我就索性欣賞其華麗的車身設計，盡情細味其奢華的車櫳享受。雖然比起傳統的豪華房車例如平治S-Class和寶馬7系等對手，不得不承認Audi仍居於阿二位置，不過這一代A8L似乎有望為Audi打破這個宿命，其外形無疑比上一代更加破格，長陣設計加上閃爆的Audi招牌鬼面罩，大有君臨天下之勢，難得它做到剛柔並重，車頭的鑽石形LED頭燈則散發艷麗一面，亦為A8L贏取不少目光。
嘆遊艇艙內櫳
不過要真正成為上等人，踏入車廂才令人體會奢華的一面，全車內櫳都滲透着歐洲豪華風格，真皮座椅造工細精，柔軟舒適，令人有睡一覺衝動，不過如果咁就瞓着可能令你後悔莫及，事關多角度按摩系統等住你試玩，技術如何？力度偏向輕柔，與一般拳拳到肉的按摩椅有別。在香港試車永遠遇到一個大問題，塞車、慢駛等，不過今次雖然窩在車廂，不過依然令人樂趣無窮，在隔音極佳的車廂內，猶如自己小天地，一時試玩按摩座椅，一時舉頭望天幕式天窗，一切都變成享受。
不過個人覺得A8L不但為老闆提供極佳的後座環境，駕駛這部車亦帶來不一樣的駕駛樂趣，相信車廠一早考慮到一時技癢的老闆可能想大過司機癮，這方面花了不少心思，駕駛席如遊艇艙，波棍桿改成遊艇推桿設計，加上中控台直伸至中槽佈滿各式各樣按鍵，HighTech感甚強，其中MMI多媒體介面最具玩味，配上Touchpad，要用自動導航，喺Touchpad上面寫個字就可識別。曾經以為巨無霸的體形在香港路面難免成為障礙，但出乎意料操控時頗為靈活，而且睇位極佳，唔使就住就住，這方面設計師居功不小。
A8L4.2規格
引擎：4,163ccV8
馬力：372ps/6,800rpm
扭力：45.4kg-m/3,500rpm
傳動：8前速自動+/-波
售價：$1,654,000起
查詢：25281862（合迪汽車）