「冇乜需要去合併，人哋想分享我哋大陸嘅市場，咁我哋有冇需要同人分享呢？我個人暫時係唔贊成，呢啲所謂合併，睇唔到對交易所有好處！」正當各地交易所合併成風，連成日想爬香港交易所（388）頭嘅上海都同巴西結盟，話港交所冇必要同人合併嘅唔係「阿邊個」，而係港交所董事李君豪。
根據李君豪講法，近排幾個交易所結盟，都係建基喺各有所求─「譬如倫敦交易所收縮得好快，一定要同人合起上嚟，希望maintain或者加大佢嘅市場額度，咁紐約冇自己嘅結算所，而德國有好強嘅結算所，所以……」至於香港，暫時仍然有條件「不求人」，因為市場冇收縮之餘，仲不斷擴張。過去兩年，仲係全球IPO融資排名第二。
港有條件「不求人」
不過，大家都話要國際化喎？「可能對某啲員工同CEO嚟講，咪飛嚟飛去囉，所謂全球化係誇大咗，我覺得站喺投資者同發行商嘅立場，你合唔合併同佢哋係冇關係嘅」。李君豪話，投資者買隻股票，係睇賺唔賺到錢、有冇流通量、風險管理同公司管治係咪做得好；發行商想上市，係揀有流通量嘅市場，同埋睇，係咪畀到佢最好嘅價錢同合理嘅PE，仲有就係監管唔會太過份，因為有啲地方已經係矯枉過正到令成本唔合理……譬如新加坡同澳洲合併，可能係交易所啲管理層自己覺得過癮啫！」
咩情況之下，港交所需要考慮併購呢？「如果有其他交易所嘅IT同埋人才，港交所可以用到嘅話，咁嘅情況可以值得考慮，所以董事局都好理智，公眾利益行先，而作為董事，我係反對，除非對香港、股東有利喇。」即係話，港交所唔使隨波逐流搞合併。
李君豪話，其實佢都唔贊成跟風延長交易時間，「因為作用唔大，後尾我都部份同意，係因為希望同大陸拉近接軌，但延長係唔會增加成交量o架，呢個交易所亦承認，甚至乎有啲人話，不如開24小時，呢個係好幼稚嘅想法。」
延長交易「作用唔大」
「如果你買咗隻股票，人哋開埋夜晚，你冇可能唔睇埋，咁就影響咗qualityoflife（生活質素），去到24小時嘅話，好快就冇人做，因為你賺到錢都冇命享，好快就會放棄」。
反對嘅理據仲有一點，「基本上開市個陣成交量大，因為好多時要cover夜晚發生咩事，而收市個陣成交量大，係因為好多基金要定聽日個價，中間你延長，其實係冇分別，今時今日亦有交易所延長咗，但好明顯成交量冇大增」，仲有就係，呢個新措施做唔到pricediscovery（價格發現）嘅效果，亦非常之擾民。
反對又好，贊成又好。4月港交所重選董事，李君豪就要尋求連任，唔經唔覺，原來已經係第五次。佢話難忘嘅嘢，唔多，但每單都唔嘢少，「個陣擘價縮到咁細，對小市民係好不利，得我一票對所有人，後尾經過兩個半鐘嘅討論，最後我方有10票，對方只得兩票，成功翻案，成功嘅論據係呢樣嘢剝削咗好多投資者」。
「仲有上一次選舉嘅時候，當時我係某上市公司嘅董事，後尾我都發揮咗獨董嘅職責，但某人利用呢個機會攻擊我，但去到尾，全部人都支持我，最後成功留任，個陣有報紙話，係李君豪嘅保位戰，都係o架。如果俾某人做得成，董事局個balance會有影響。4時15分截止投票，4時10分，我仲call緊人……真係唔容易o架。」同樣，今次佢認為都係唔容易。
記者：何凱兒
大有來頭
父創分期付款買電器
提起李君豪嘅爸爸李東海，一般人即刻諗起嘅係東華三院主席、香港嘅大慈善家、東泰集團老闆。好少人知道，佢仲係喺香港推行寄售同埋分期付款辦法嘅先驅。
1952年，李東海創辦咗東泰貿易公司，做香港、意大利同日本嘅三角貿易，因為佢係無線電專才，所以生意初期以入口電器為主。當時，佢代理意大利「雪白牌」雪櫃（圖），可謂街知巷聞。
但更受消費者歡迎嘅，應該係佢喺六、七十年代首創寄售同分期付款辦法。嗰陣一般中產家庭收入每月大概得$300，普通白領月薪$120。租住60呎板間房月租約$60，扣除衣食住行等開支，剩低嘅錢根本唔夠買家電。
經銷商推銷收定金
於是，李東海諗出首創分期付款呢條橋──經銷商只需負責推銷，收客人首期定金做利潤，然後由代理商同客戶簽合約，所有送貨、保養服務同埋收取分期付款，完全由代理商負責。
呢個咁創新諗法，令平民百姓可以先享用後擁有，亦符合小市民量入為出嘅生活方式，深受買賣雙方歡迎，幾十年後嘅今日，分期付款嘅辦法仍然廣泛應用喺各行各業之中。
幼承庭訓
作育英才回饋社會
李君豪爸爸一生低調行善，幼承庭訓，李君豪學足爸爸，取諸社會，用諸社會。而做得最多嘅，可能係作育英才呢一環，「我都係咁教我嘅仔女，佢哋讀書唔係為我，係為咗將來可以幫到其他人，讀書唔係自私嘅。」李君豪透露，佢喺大陸捐咗三間希望學校，但無一間係用佢個名，「用自己個名會剝削咗佢哋向其他人籌款嘅機會！」
唔講唔知，李君豪仲係香港加拿大國際學校（圖）嘅創辦人之一，「90年嗰陣，好多人移民去加拿大，香港有人才流失問題，政府希望我哋搞間國際學校，幫助啲人回流，一班熱心人士好辛苦，每日朝7晚9點，每星期一至五，連續9個月無停過開會搞學校。」
1991年，學校正式開門，今年20周年，有超過1800個學生，仲係好多家長第一選擇。
低調守業
富二代返工無放假
「低調或者係受爸爸影響！」李君豪話唔鍾意出名，最重要係做唔做到嘢，所以明年立法會選舉佢無興趣去爭「個位唔易坐，就算坐到，做唔做到嘢，又係一個問題，我個人係唔介意付出，亦唔介意犧牲自己，如果幫到其他人幫到香港嘅話。」根據往績，佢應該係「做到嘢」。
低調之外，李君豪亦係少數實幹型富二代「我90年返東泰，一直未放過假……因為爸爸自己幾十年都無放過假」舊年爸爸仙遊，佢正式成為當家，秉承父親大公無私，寧願自己賺少啲，都唔要令人蝕。「但個名聲對我好重要。」但做法同父親唔一樣「唔係要日日做，要賺錢就要做投資，一年做一兩單大嘅已經夠……我哋面對國際大行，競爭比較辛苦，人哋財雄勢大，無辦法啦！」
「站喺業界代表嘅立場，我不斷爭取一個公平嘅平台，唔好成日側埋一邊，以國際化名義，側埋一邊幫晒啲大行，希望政府畀個公平嘅競爭環境，就算唔使你幫，都唔好踩！」
站喺個人立場又點呢？「呢場仗非常難打！你只好認命，同佢哋齊齊合作一齊搵錢……我都係佢哋（大行）嘅客仔嚟o架！」