今年係辛亥革命一百周年，激發起好多民族情緒，好似香港中華總商會會長蔡冠深（圖）咁，佢話自己雖然唔係革命家，但係要為香港搞革新！
咁激？實情係蔡會長會趁住今年中共全國「兩會」，為香港工商界提交四大提案，都係針對拓展港商營商機遇。佢話其中一項提案，係為香港市民爭取內地居民資格！有咩着數呀？佢話純粹從商業因素考慮啫，因為佢睇中內地「十二．五」規劃裏面嘅擴內需發展重點，若果港人可以藉此享受內地居民待遇，意味港商喺祖國有獨資嘅機會，直接受惠國策優惠……華華就無諗得咁深奧，只係假如可以好似啲同胞咁喺各大名店「秒殺」啲手袋銀包呀咁，華華就好樂意拎大陸身份證囉！