養兒防老，但家陣嘅年輕人，自己生活都唔知搞唔搞得掂，仲點旨意佢哋供養父母。新興啲嘅係──置業防老，有瓦遮頭似乎個心係會定啲。不過，敏妮前排聽到一個故事就有啲感慨。
話說一位Uncle，年輕時做嘢拼搏，深得老闆信任，當年工業北移，佢老闆閂咗香港間廠房返大陸開廠，Uncle幫老闆喺大陸奔走。嗰位老闆後嚟鼓勵Uncle自己創業，仲介紹唔少生意俾佢，所以Uncle事業都算一帆風順。Uncle有兩個仔，一個喺商界，做嘢勤力交帶，不求有功，但求無過，雖然唔算平步青雲，但咁多年都穩穩陣陣。另一個仔搞藝術，試過幾次面試失敗，之後就自暴自棄，一直靠父親接濟。
送樓畀仔女 難要求同住
Uncle家陣已經退休，退休前佢做好晒準備，自己同太太租屋住，但買咗兩層樓分別俾大仔同細仔，條件係要兩個仔應承照顧佢兩老至百年歸老。Uncle退休無耐就中風，Auntie送咗佢去安老院，請咗位看護照顧。
Uncle本來積蓄豐厚，但因為中風使咗大筆錢，加上住安老院同搵看護照顧，所以積蓄都用得好快，Auntie諗住慳番租屋嘅錢，搬去同未有家室嘅細仔住，點知細仔原來同女友同居，終日游手好閒，一句唔方便就拒絕咗媽媽嘅要求。大仔自己有兩個小朋友，屋企容納唔到多一個人住，但願意每個月俾生活費Auntie。
想攞返層樓 或需搵律師
Auntie好激氣細仔咁對佢，想攞返層樓。本來人哋家事，旁人唔應該多意見，但由於買樓嘅錢全數由Uncle支付，加上細仔未有履行照顧兩老至百年歸老嘅饋贈條件，敏妮建議Auntie搵律師俾意見。一向精明嘅Uncle，相信點都諗唔到，無論「養兒」抑或「置業」，都唔能夠「防老」。
溫敏妮
http://wanmanli.com/blogs/