籌備經年嘅鄉議局沙田石門新大樓鐵定4月2號入伙，早前贊助咗4,000幾萬畀鄉議局建大樓嘅香港馬會，噚日更加喺沙田賽馬搞個「鄉議局盃」，破天荒唔使鄉議局贊助賽事之餘，仲喺廂房宴請鄉議局來賓，可見發叔嘅江湖地位。發展局局長林鄭月娥同民政事務局局長曾德成都有現身捧場，但就無落注，無機會發新年財。
大派貼士 鄉紳歡迎
既然係賽馬活動，又點少得簡sir（簡炳墀）嘅蹤影？冇喺鄉議局現身多時嘅簡sir噚日滿場飛，不時俾人問佢攞貼士。簡sir喺呢方面絕對唔吝嗇，所以好受鄉紳歡迎；之但係盛傳會重出江湖參選上水鄉事委員會主席嘅佢，被八方問到係咪嚟真時，竟然話冇貼士，強調鄉委會3月初截止參選提名後，一切自有分曉。
但簡sir依然不脫牙擦本色，話自己雖然喺鄉委會退休成8年，但以前都做過成十幾年上水鄉委會主席，現任主席侯志強以前仲係「跟」佢嘅㖭。佢反問八方：「你話我仲有冇實力（發音：食力）吖？」言下之意都極有機會再出賽。盃賽最終由7號馬「非常好」跑第一，發叔同發嫂親自頒獎。