新民黨成立短短兩個月，揀咗喺荃灣開設首個地區辦事處，顯然係為明年銳意喺新界西立法會選舉落場嘅副主席田北辰鋪定好路。噚日辦事處開張，除咗主席葉劉淑儀親自坐鎮，有荃灣「市長」之稱嘅區議會主席周厚澄，以及荃灣同馬灣兩個鄉事委員會主席都有到賀，身為鄉議局顧問嘅田二少似乎有唔少鄉紳支持。
荃灣之後，田二少下一站係屯門。扮過掃街茂體察基層市民苦況嘅田二少，原來已經去信港鐵同巴士公司，希望佢哋減低清晨時分車費，幫幫要天朦光坐車返工嘅市民。葉劉自爆港台都搵過佢參加《窮富翁大作戰》，但因為時間唔啱而推咗，揚言有機會都想參加，只要唔嫌佢雞手鴨腳，可以試吓做快餐店速遞員喎。