新春車牌拍賣噚日開鑼，今次有好多靚冧巴出籠，個場旺丁又旺財，半日庫房收入接近2,000萬。全場焦點係無字頭16號車牌，有位製衣老闆豪擲850萬蚊投得，價錢排10大拍賣車牌榜第四位。香港有錢佬真係多，呢位老闆話預咗要出1,000萬，點知唔使，個牌真係抵喎。
噚日，拍賣場好熱鬧，除咗車行代表，唔少人一家大細湊熱鬧。叫價最激烈係無數字車牌「LL」，開價只係5,000銀，買家瘋狂舉手，每口價十萬廿萬咁，最後80萬成交。不過，仍有唔少靚冧巴乏人問津而收回，例如HH2288、無字頭84等等。
自稱別名「孫文」
當拍賣官宣佈無字頭16號底價524萬蚊，全場嘩嘩聲，但係都有三幾個買家爭住舉手，叫咗十幾廿口價、唔使一分鐘就推到700幾萬，呢個時候手持112號牌嘅「程咬金」殺出，成功以850萬蚊投得。本來志在必得嘅車牌中心董事顏文翰飲恨，仲懷疑呢個程咬金係新鴻基地產（股票代號16）嘅代表。
不過，事後先知，呢位程咬金表面上同新鴻基冇乜關係。佢叫孫少文，自稱別名「孫文」。佢唔係搞革命，只係從事製衣配料業。由於近排生意興隆，所以佢預備用1,000萬蚊買呢個車牌，「16號係我嘅luckynumber。有啲無字頭都要千幾萬啦，850萬好合理。」
拍賣場名人雲集
孫文本來仲諗住用250萬蚊投埋無字頭668號送畀老婆，點知畀其他買家推到overbudget先退出，輸返一次畀顏文翰，個牌300萬蚊成交。孫文話，投到16號已經好開心，下次再接再厲。有記者問佢係咪內地富商，佢話自己係「global」，頓時型咗。
今次拍賣有唔少名人現身。夏蕙姨着件紫紅色大褸，冇點舉過手就走人。反對維港填海嘅律師徐嘉慎揸住18號牌全程冇叫過價，同佢分開坐嘅朋友就投到無字頭2368車牌。原來呢個牌係徐嘉慎嘅目標，託朋友幫手投。拍賣官開價18萬，佢朋友舉一次牌就成交，低調策略成功。徐嘉慎同八方講，個牌本屬亡父，徐父70年前開始用，過身之後政府收返。第一次拍賣徐嘉慎失手投唔到，今次終於成功。
mailto:[email protected]