無綫新劇《OnlyYou只有您》一眾演員，噚日扮成11對新人，喺黃金海岸酒店行婚禮，全部女演員都着婚紗，點先可以搶鏡？岑潔儀同梁政珏親自示範，佢哋大騷事業線，後者着低胸婚紗仲中門大開，34D酥胸半露，俾李中希抱起玩遊戲時，為咗唔好走光，梁政珏即用手遮住事業線，動作多多，唔搶鏡至奇。現場見梁政珏上圍勁咗好多，十足兩個湯碗飛出嚟，佢話：「肥咗啲啫，件婚紗唔可以再攝到墊，只係用番本身個胸墊。」
蒙嘉慧（YoYo）同鄭嘉穎挽手進場，田蕊妮即大叫YoYo男友鄭伊健個名，其他演員都叫YoYo做鄭太，見佢笑得不知幾開心，問YoYo係咪好想做鄭太？佢話：「今日着婚紗已經好開心，原來結婚咁辛苦，如果真係嫁得出未必會咁鋪張，最緊要開心，我唔係要求一個婚禮，始終婚姻重要啲。」
嘉穎代伊健
鄭嘉穎臨時做咗YoYo身邊嘅鄭生，佢好抵死話：「今日做替身度吓個位，等佢第日行得順啲，同埋想同伊健講，阿Yo好輕，唔使擔心，祝佢哋甜蜜順利。」提到有消息話佘詩曼翻撻嘉穎，佢話：「呢啲都好信？我哋一直都係朋友。」嘉穎仲直認有傳短訊問候阿佘隻手嘅傷勢。
詩詠護邦邦
另外，唐詩詠即場抽到金兔一隻，近半年佢成日抽到獎，有人話佢係甩咗崔建邦後行運，唐詩詠當然話唔關事。講到無綫高層樂易玲叫崔建邦做幕後，唐詩詠仍然為前男友講說話：「大家畀啲時間佢，每個人都有迷失時候，相信佢好快會搵番自己。」