每年到預算案時間，必然聽到各方要求減稅派糖之聲，唯獨是煙草稅一樣，必然有個「吸煙與健康委員會」要求加稅，今年更要求將稅率提高至75%。左丁山從不吸煙，根本唔知道一包煙嘅零售價，呢日睇now電視新聞，作家李默小姐現身說法，話佢每月用嘅買煙錢超過一千元，又好似幾多噃，假如每日食一包煙，一個月三十包，咁每包咪超過三十元？真係幾貴吓，如果再加稅七成半，稅款轉嫁到煙民身上，李默小姐一個月就要用多七百五十至八百蚊，唔怪得佢在鏡頭前顯得好無奈，話咁高嘅煙稅對平民不利。
據左丁山平日觀察，基層地區有不少人吸煙，中環好似比較少一啲，但在橫街橫巷，每日都見到唔少人站在巷內吸煙，左丁山嘅寫字樓下面就是如此，而且巷內吸煙人士之中，OL佔咗五成，這或者係有偏見樣本（biasedsample）喇。左丁山聞煙即咳，每日走過煙巷，必定加快腳步，一位不吸煙老友嚟寫字樓搵左丁山，問到：「向管理處投訴啲煙民阻街啦！」左丁山話唔好干擾他人自由，理由並非有厚愛於吸煙者，而係覺得經過幾十年反吸煙宣傳與近二十年禁制煙草廣告，煙民應該知得非常清楚，吸煙有害健康，因吸煙染病，與人無尤；美國一啲人及州政府因吸煙病症而控告煙草公司要求賠償幾十億以至幾百億美元，無非係將煙草公司當作肥羊劏啫。成年人自由選擇吸煙，話之佢啦，而且室內已完全禁止吸煙，煙民可以吸煙嘅地方唔多，唔駛趕絕佢哋呀嘛？
全世界政府都係假惺惺，以維護人民健康為名，向煙草徵收超高稅，如果真係關心人民健康，咁點解冇一個政府當煙草係鴉片煙，立例禁絕？政府其實係唔捨得啲稅收就真，記得香港財政司宗師郭伯偉就話過，煙稅太高只會鼓勵私煙，海關行政費用高，加稅得不償失，歷任財政司當然知道呢一點。而且稅率太高嘅話，有錢人可以負擔，基層市民就被逼戒煙，可能一路戒，一路問候高官，甚至因而仇富，何必呢？