華仔、朱麗倩深夜撐枱腳

劉德華09年被本報獨家踢爆08年與朱麗倩在美國拉斯維加斯秘密結婚，事後華仔亦公開承認婚訊。不過，一向對感情事極度低調的華仔，不論婚前還是婚後，也鮮有跟朱麗倩在香港食肆食飯撐枱腳，直至前晚，二人竟罕有地到尖沙嘴海港城的太平洋會開餐。

華仔前晚與太太朱麗倩及女友人到尖沙嘴太平洋會食飯，記者趕到現場時眾人正在話別。

穿黑白格仔褸的朱麗倩垂着頭急步登上華仔的白色七人車。

華仔助手以身掩護華仔火速上車，一向着鞋唔着襪的華仔只被攝得一隻腳（箭嘴示）。

助手以身護主

前晚11時，有人目睹華仔與朱麗倩及兩名女友人在只招待會員的太平洋會中菜廳食飯，當時已過了晚飯時間，中菜廳大廳僅得華仔夫婦一圍枱，估計華仔是怕被人發現，刻意選擇遲一點開餐。
記者接報後於晚上11時45分趕抵現場，剛好華仔與朱麗倩食飽飽準備登上白色七人車離開。前晚朱麗倩穿上黑白格仔大褸，華仔則穿黑色羽絨，夫婦二人跟女友人道別後，華仔男助手先為朱麗倩開車門，之後朱麗倩垂着頭一支箭登上七人車。其時華仔助手發現記者，即第一時間通知華仔及用身掩護華仔上車，然後全車拉上窗簾後極速離開。
多年來，華仔一直恨做老竇，並四出尋求生仔秘方，甚至計劃人工受孕，但一直未能成功。去年10月曾傳出朱麗倩懷孕3個月，但事後華仔否認其事。據悉，由於華仔有見努力多年仍未造人成功，所以決定放棄，一切順其自然。
採訪、攝影：楊浩賢、朱志聰

華仔09年跟朱麗倩世紀拖手返港，哄動全城。