歐陽靖（MCJin）搶閘做兔年老襯，佢同圈外女友Carol已經喺美國時間2月12號舉行溫馨又浪漫嘅婚禮，身在紐約度蜜月嘅MCJin噚日破天荒喺facebook公開兩公婆嘅私房照，一於同班fans分享新婚喜悅。聽聞新郎哥喺下個月先會返港，開拍TVB新劇《LaughingGor》，劇中佢仲會扮演謝天華嘅卧底下屬。
借歌示愛
MCJin平日最鍾意上網同自拍短片，不過佢對另一半就非常保護，從未帶過Carol正式出鏡，噚日佢首度張貼同老婆嘅合照晒甜蜜。相中兩人戴情侶墨鏡，一齊企喺沙灘嘅一棵樹後面，各自露出半邊身，相當搞鬼。MCJin着背心，Jin太就着三點式，露出手、腰、髀，相嘅背景有藍天白雲同彩虹，靚到同油畫一樣，但相信一對新人嘅心情比起明媚風光更靚。
28歲嘅MCJin其實都幾幽默，之前佢喺fb以兩隻着禮服婚紗嘅毛公仔相片宣佈婚訊，到結婚嗰日，佢張貼一張四格相以示做新郎哥，相中嘅佢執到正着西裝，但全部都冇影頭部；婚後兩日即情人節，佢仲借徒弟KT嘅情歌《唯獨你是不可取替2011》同太太示愛㖭。
前日MCJin又上載短片，由一位美籍男友人以半鹹淡廣東話講述自己喺香港生活嘅點滴，佢話唔鍾意食雞腳，覺得好難食，喺美國大嘅MCJin就一早融入香港文化，留言笑對方要鍾意食雞腳，先可以同佢做朋友喎。