讀者李來信指本港學校教科書多、教材多、功課多，係教育死結。其實教育界亦要為市場而競爭。市場也者，即學生數量，冇學生就冇教育局津貼，要殺校，教師失業。教師界工會無論係教協或教聯，都反對殺校。市場萎縮，學生數量縮減之時，就要求各校一齊縮班；受歡迎學校自願收少啲，等一啲在殺校邊緣嘅學校可以收番夠數，維持學校營運。前天文台長林超英為母校英皇縮班而感到不平，堅決反對，政府就勸佢為社會大局着想，潛台詞就係：「林先生，你都要顧吓一啲教師嘅飯碗！」
點解一啲學校受歡迎，一啲不受歡迎呢？原因多到數唔晒，不過憑左丁山多年觀察所得到嘅經驗，功課少、教科書少嘅學校，一定俾大部份家長批評。影響所及，有邊間名校唔催谷學生讀書呀，越係催谷，家長越喜歡，不惜每科都請補習教師。呢日睇now時事全方位，一位觀眾打電話批評直資學校唔多教書，家長要每個月花費七至八千元為兒子請補習老師。嘩，用咁多錢嚟補習，抵唔抵呀，一學年就用七萬八萬咯噃，相形之下，全年買齊教科書都不過係三千元左右。既然直資學校咁冇生產力，點解唔叫兒子退學，去讀第二間呢？此乃香港家長嘅心結，係唔係香港教育嘅死結呢？見仁見智。外國人一啲都唔覺得係。據聞一個官府率領嘅學界代表團去年前往英國考察電子教學、電子教科書等等，不要以為英國好先進，原來英國教育界高度讚揚香港教育成績好好，學生好掂，而電子教科書在英國到目前為止，對教書仍然冇貢獻，發展停滯不前，英國模式唔值得香港學習，英國教改反而回歸舊習，用番一啲幾十年前嘅教學方式。
舊方式講勤力、講個人責任、講紀律，就係英國教育改革要求學生做得到嘅。我地有大學碩士生，搵工搵唔到，攞綜援，對李慧玲講到係社會的錯，自己冇錯，聽到令人搖頭。廣告界名人曾錦強在am730專欄（二月十七日）講到佢與該名碩士生是大學校友（中大），亦係統計系校友，指出學歷不是資產，畢業後入到職場就要從零開始，參加另一次比賽。曾錦強講嘅係顯淺道理，可惜一啲八十後就係唔識！呢樣更係香港的教育死結。