自由黨榮譽主席田北俊重出江湖似乎真係有運行，前日再做爺爺，兒子為佢添多個孫女。當日田少去咗沙田同鄉紳拜年，入鄉隨俗同時上香畀車公，祈求萬事大吉。
咁近城隍廟，鄉紳自然識做求番支好簽，八方唔係講拜神嗰種求簽，而係趁機會問田少攞貼士，事關田少名下馬匹風雲武士明日出賽，大家都想知田少有冇獨家好料。人逢喜事，田少十分順得人，據講好有信心咁話希望雙喜臨門，抱孫後再拉頭馬就真係好到極，好客氣咁話如果大家想分享吓佢啲喜氣，不妨捧吓場，但田少亦強調小注怡情。風雲武士上場勝出，據講勇況持續，今次爭取連捷，八方預祝田少心想事成。