隔牆有耳:鄭耀棠終開刀搞掂頸痛 - 李八方

隔牆有耳:鄭耀棠終開刀搞掂頸痛 - 李八方

受頸椎移位之苦暴瘦20磅嘅工聯會會長、行政會議成員鄭耀棠,在廣州做推拿、氣功只能治標,長痛不如短痛,棠哥毅然決定開刀希望斷尾,噚日做手術,十分順利,佢隨即向友好報平安。
據知棠哥去年10月到武當山旅行,可能平日少運動,上落山時無情力扭到頸椎,初時只係感到手腳麻痹,後來越來越嚴重,痛到寢食難安,推拿氣功都冇大作用。
醫生建議佢開刀,不過風險幾高,因此棠哥心大心細唔知應否做手術,然而頸痛加劇,因此佢最終都係決定入院,幸好手術成功,休養後應可痊癒。
為免舟車勞頓影響療養,棠哥今年好大機會唔會上京開全國人大會議。