做過地鐵主席兼行政總裁，又打過電盈工，堪稱「打工皇帝」嘅蘇澤光，09年開始獲政府委任入貿易發展局做主席，雖則貿發局每年預算達廿億元，不過主席卻係「義工」。
貿發局職能係幫香港廠家同商家做出口生意，近日蘇澤光卻倒番轉頭，親自幫美國做咗一單入口香港嘅嘢，不過唔係美國產品貨品，而係花旗國細菌。話說蘇澤光最近去美國度假滑雪，唔小心染咗感冒，結果帶埋美國流感返港，佢話好彩美國菌冇香港菌咁厲害，因此佢仲行得走得，唔使瞓喺醫院。
為貿發局度橋
蘇澤光滑雪多年，佢話自己技術尚可，但每次滑雪都要請個教練傍住，唔係要精益求精改進技術，而係請教練喺後面睇住，防止生手橫衝直撞碰埋佢度。
貿發局成立多年，除咗一年一度書展，市民未必認識貿發局工作，蘇澤光話今年想做多啲功夫，希望增加市民對貿發局工作認識。佢係橋王，真係要做嘅話，應該冇乜難度。