51歲的蔡楓華3.26重踏舞台舉行演唱會，日前他出席個唱記招，黑超透出一點傲氣地說：「我係搵食，唔係乞食，記住我呢句話。」80年代初，紅唇王子蔡楓華紅爆，橫行歌影視播四棲，跟張國榮和陳百強三分天下雄霸偶像界；85年蔡楓華在《勁歌》季選中以「一剎那光輝唔代表永恒」形容張國榮，自此光環消失，歷盡26載浮沉起跌才終極回歸樂壇。燶華已過，《絕對空虛》勢必風華再現。 撰文：夏琴
船長起錨
港台《香蕉船》是全港首個直播兒童節目，70年代末第一代的《香蕉船》由蔡楓華掌舵，他披帥氣船長制服，以船長哥哥身份亮相，香蕉姐姐是靚DJ鄧藹霖，兩人在假船上唱兒歌玩遊戲細路，節目大受歡迎。主題曲「香蕉變出香蕉船，船上面有一排歡笑臉……人人話那彩虹香蕉變。」如今再聽百般滋味在心頭。
青春偶像
80年代楓華霸氣初現，多得麗的經典劇《IQ成熟時》帶挈，與鍾保羅、鄧藹霖和莊靜而齊齊升呢香港第一代偶像劇元祖。蔡楓華劇掂歌更掂，「每次我寫新詩，費盡勞力心思……」講盡當年少男少女靠情信示愛的真實面。
白馬王子
芹菜蔡楓華和Danny仔陳百強同期出道，target均是學生粉絲，所以白恤衫已成為這兩位學生王子的主打服。芹菜走日風，丹尼仔行憂鬱，當年電台日播夜播兩人情歌，家中冇他們的錄音帶看門口，等同唔夠潮。
巨星風采
蔡楓華在CBSSony年代被封巨星，不得不提《也許》小插曲。此曲本是同門何家勁的83年作品，唱片公司偏偏選了同碟的《方小敏》派台，其後芹菜翻唱這首滄海遺珠即hit。也許展昭飲恨，又也許芹菜好運。
潮流教祖
「蘇打pad」不是徐濠縈專利，早在廿幾年前蔡楓華已將大膊頭發揚光大，襯上高腰蘿蔔褲，那冷酷的眼神，微長的蛋撻頭，日系風濃濃。蔡楓華當年有朵「香港玉置浩二」，唔係你估！
事業巔峯
蔡楓華近乎一字馬坐地的V字馬步，fing頭fing腦高呼《絕對空虛》，把他的歌唱事業fing到高峯。阿燦廖偉雄扮蔡燶華着上一式一樣的橙色大膊西裝大嗌《蝕到空虛》，將空虛放到無限大，成為電視搞笑經典。
一語成讖
26年前，同於麗的出身的蔡楓華和張國榮轉戰樂壇，但前者大熱歌《愛不是遊戲》於85年《勁歌》季選慘敗，哥哥卻有三首金曲上榜領風騷，蔡楓華的光輝論源自於此，誰料他往後居然輸得更轟烈。
楓華諷語
2000年2月譚詠麟邀請蔡楓華做演唱會嘉賓，至蔡楓華在伊館開騷阿倫禮尚往來撐場卻被窒，蔡楓華寸嘴說：「我交際應酬唔夠你多，拍馬屁唔夠你嚟！」EQ高的阿倫嘻嘻哈哈作罷，不過轉頭蔡楓華又辣杜德偉是菲律賓仔，令台下觀眾Ｏ晒嘴。
型男行騷
蔡楓華應設計師鄧達智之邀為00年1月舉行的時裝節擔任模特兒，行騷前他還預計着裙露腳毛，淡然說：「型男Simon都露腳毛啦，任達華，Simon呀！」之後補多句：「我要型唔係問題！」鴛鴦髮色配腰鏈着裙，KenChoi都in過o架！
黯黑戰神
十幾年前蔡楓華已自認型棍，去年10月他重出江湖再上《勁歌》英雄地，頭頂已禿的他將兩邊頭髮染黑，配上一身購自MK的黑戰衣，由頭執到腳花費$850。全黑達人好歌重溫，難得水準不跌watt。
