28歲袁小曼去年搭上49歲已婚地產代理CEO廖偉強，袁小曼日前更高調到中環選購婚戒揚言6月坐正做廖太。不過廖偉強原來還未與太太梁幼娥辦妥離婚，前日正印廖太接受本報記者訪問，數臭丈夫十多年來多次背叛，她說：「佢同過秘書又同過o靚模，以前佢一唔高興就用粗口鬧我！」
擁35D岩石胸的08年落選亞姐袁小曼，去年初與廖偉強撻着後經常高調晒恩愛，不但多次自爆男友已辦妥離婚，自己快將坐正，甚至要男友買貝沙灣豪宅，準備搬正廖太隔鄰。不過，廖氏夫婦原來去年12月才入紙申請離婚，下月2日才在家事法庭聆訊，換言之其妻梁幼娥到目前仍是廖太身份。日前袁小曼又再次高調到中環選購結婚戒指，對廖太而言，無疑在其傷口灑鹽。
「呢個人冇用」
為不想再受傷害，廖太前日主動約見記者，在胞姊陪同下首度開腔接受訪問，大談過去十多年來丈夫的不忠和傷害。
廖太87年與廖偉強結婚，婚後育有二子，現分別已21歲和15歲，她向記者展示與丈夫的離婚文件，文件上註明二人去年12月才入紙辦離婚。廖太說：「係我提出嘅，兩個仔跟我，但我要攞番我應得嘅嘢。」
廖太表示09年與廖偉強分居，對於袁小曼跟丈夫交往，廖太揚言看到報紙後才知道，問她可會嬲袁小曼？廖太說：「佢做咁多咁挑釁嘅嘢出嚟，係女人都會嬲。」
廖太胞姊不忿說：「既然搞緊離婚，何必仲要三番四次去刺激佢（廖太）？個女人喺報紙度話廖偉強買咗層貝沙灣畀佢，我妹妹話有冇搞錯呀，同一個門口出入（廖太現居貝沙灣），啲細路仔會撞到o架，係咪想激死佢？久唔久又講啲唔係事實嘅嘢，又話幾時結婚生仔，結果激到佢入醫院。」
廖太說：「舊年大仔見到爸爸同姓袁個女人嘅新聞，打畀爸爸問乜嘢事，點知佢同個仔講：『有乜問題？個個男人都係咁o架啦！』男人有錢就身痕！機會我畀咗佢好多好多次，佢一次又一次令人失望，連個仔都識叫我放手，呢個人已經冇用，以前佢一唔高興就鬧我哋！」
「眼淚已流乾」
「佢（廖生）唔係第一次，呢十幾年嚟試過好多次，又同秘書又同o靚模，我傷心過好多次，眼淚已經流乾。當日嫁畀佢嗰陣，佢乜都冇，到今日我亦都唔係為錢，係為咗公道，由得個官判，佢判我有就有、冇就冇。個女人（袁小曼）咁恨做廖太，咪由得佢做囉！」廖太胞姊再數廖偉強說：「佢哋試過一家大細去玩，個男人竟然約埋個情人喺大阪見面。聽講嗰個情人唔係姓袁，喺姓姜嘅o靚模。」
採訪：何慧斯 攝影：陳慧安